Shillong, Naitung, 31: Ka jingjot rathai jong ka surok Daiñ Thlen, kaba dei ruh ka surok kaba pynïasoh ïa kiba bun ki shnong ha ka thaiñ Riwar ka la long ka jingpynlehraiñ ïa ka Jylla Meghalaya hakhmat ki nongjngohkai pyrthei kiba wan nabar jylla ban leit shang suwari sha ki jaka jngohkai pyrthei kiba don ha ka thaiñ Sohra.
Ym lah ban len, ba ka shnong Sohra ka dei kaba jur slap tam ha ka pyrthei bad ka jingjot jong ki surok ka dei hi na ka jingkhoh jong ka rong tang shu hap u slap bad ka surok ruh ka la shlei da ka um ktieh kaba pynsyrtok haduh katta katta ïa ki nongleit nongwan bad kumjuh ruh ïa ki kali kamai Tourist kiba kit ïa ki nongjngohkai pyrthei kiba leit peit kai ïa ka jingithiang jong ka Kshaid Daiñ Thlen.
Ïa kane la sakhi lyngba ki video ba la phah da ka Hynniewtrep National Youth Front (HNYF) Sohra Riwar Circle sha ka Batesi tv.
Lyngba u kyrwoh, u President Bah Kitboklang Hynniewta bad u General Secretary Bah Donboklang Donshiew ki la kyntu ïa ka tnat PWD bad kan phah maramot noh kham kloi ïa kane ka surok khnang ba kan ym buh jingeh ïa ki paidbah ha ka leit ka wan bad ka rah ka rong namarba ka jinghap slap ka la kham duna.
Ki la kyntu ruh ïa u kontraktor uba pyntrei ïa kane ka surok ba un sdang noh ïa ka kam khnang ba kan pynsuk ïa ki paidbah nongleit nongwan bad ïa ki nongjngohkai pyrthei.
Shuh shuh ki la ong ba bun na ki kali kamai kiba ïaid na surok Daiñ Thlen mynta ki la hap ban ïaid lynti shaduh ka shnong Mawkma bad ka bai kali ruh ka la shongdor T.150–T.200 hynrei lada ïaid lyngba na ka surok Daiñ Thlen ka bai kali kan dang long tang T.60.
