Shillong, Nailar, 01: Ka Sorkar Jylla ka la thaw da ka Rationalisation Committee ban khlieh da u Commissioner and Secretary ka tnat Pule Puthi ka Sorkar Jylla u Vijay Kumar Mantri ban eksamin ïa ki jingtyrwa jong ki nongtrei ha ki skul SSA kiba don hapoh ka shatri jong ka All Meghalaya SSA Non-Teaching Staffs Association (AMSNSA) kiba la pynlong ïa ka jingïakhih ban dawa ïa ka Sorkar Jylla ba kan pynkiew ïa ka jingsiew tulop haduh 80 percent hadien ba ki la kyntait ïa ka jingpynbna jong ka Sorkar ban pynkiew ïa ka tulop kaba 25 percent.
Ha ka jingïakren bad ki lad pathai khubor ka President jong ka Association ka Kong Jennifer Synrem ka la ïathuh ba ka Rationalisation Committee kan sa shong ïa ka jingïalang pyrkhat kam ha ka sngi Thohdieng ha kaba ki nongïalam jong ka Association ruh kin sa aiti ïa ki jingai jingmut sha ka Committee.
Watla ka Sorkar ka la thung ïa ka Komiti,hynrei na ka liang jong ka Association ka la pynbna ban dang ïai bteng beit ïa ka jingïakhih tad haduh ba ki da ioh ïa ka jingkular na ka sorkar da ka jingthoh.
