Shillong, Nailar, 07: Ka District Magistrate jong ka East Khasi Hills District lyngba ka kyndon 163 BNSS ka la pynjari da ka korphiw miet naduh ka por 6:00 baje janmiet haduh ka por 6:00 baje mynstep haduh 200 meter na u Zero Line (International Border) ban khanglad ïa ka ïaid ka ieng jong ki briew ha shilynter ka khappud bad ban khanglad ïa ka jingrung ruh jong ki briew na ka ri Bangladesh sha u pud u sam jong ka ri India.
Da kane ka hukum, la mana ban ïalum briew khlem jingbit ne ban pynlong jingïalang beaiñ palat san ngut, ban rah ïa ki tiar pynmynsaw kiba lah ban pyndonkam kum ki tiar ïaleh kynthup ïa ki dieng bad ki maw hapoh bad sawdong ka khappud Indo-Bangladesh. Kane ka kyndon ka mana ruh ban leh ïa ki be-aiñ, ka jingkhaïi tuh ïa ki masi, ïa u kwai, ïa u tympew, u biri, u sikret, dohkha tyrkhong ba kiwei kiwei.
Ka jingpynjari ïa kane ka hukum namar ka jinglong jingman ba mynta ha ka ri Bangladesh ha kaba ka lah ban don ka jingjam beaiñ jong ki runar sha shiliang pud, ki seng lehnoh, ki nongkhaii tuh bad kino kino ki kam be-aiñ ha khappud ka India-Bangladesh.
Namarba ka jaka khapud jong ka East Khasi Hills ka dei ka bym pat ker sainar shiah ki mynder ki lah ban wan rung beaiñ bad ki dkhot jong ki kynhun ba ju leh ïa ki kam pyntriem kiba donkti bad ki kynhun lehnoh ki lah ban ïalum ha khappud ha ka por mynmiet ban leh ïa ki kam runar ruser bad lada ym lah ban khanglad ka lah ban lam sha ka jingrung beaiñ bym lah shuh ban tehlakam bad kaba lah ban pynthud ïa ka shongsuk shongsaiñ ha ka distrik bad ha ka jylla bad ka ri baroh kawei.
Kane ka hukum kan treikam noh mardor tad haduh ban da pynbna da kumwei pat.
