Shillong, Nailar, 07: U MLA jong ka Mawsynram Constituency u Bah Olan Sing Suiñ u la pynpaw ba u ai jingkyrshan ba pura ïa ka jingmih shakhmat jong ki kynhun sengbhalang bapher bapher na ka shnong Mawsynram ban dawa ïa ka Sorkar Meghalaya Democratic Aliance (MDA) ba la ïalam da ka National Peoples Party (NPP) ba kan kyntiew noh sha ka kyrdan Civil Sub-Division ïa ka Mawsynram Community and Rural Development Bloc khnang ban pynjan shuh shuh ïa ki shnat treikam jong ka Sorkar sha ki paidbah.
Ha ka jingïakren bad ki lad pathai khubor ha ka sngi Balang, u Bah Suiñ u la ïathuh ba ynda la kut ka Dorbar Synrai jong ka Ingdorbar Thawaiñ un sa ïalam ïa ka kynhun na Mawsynram Constituency ban leit ïakynduh ïa u Myntri Rangbah jong ka Jylla u Conrad Kongkal Sangma ban pynsngew halor kane ka jingdawa jong ki paidbah nongshong shnong kaba la slem bad kaba la sah pongding da ki snem.
“Ka dei ka jingdawa kaba la slem bha, naduh ki nongïalam saiñpyrthei, ki nongïalam sengbhalang ki la dawa na ka Sorkar. Ïa kane ka jingdawa ban ai Civil Sub-Division ïa ka Mawsynram nga la dep kren ha Ingdorbar Thawaiñ namarba ka Mawsynram C&RD Block ka dei kaba la rim tam naduh u snem 1962,” la ong u Bah Suiñ.
U la ïathuh ruh haba ïanujor bad ka jingheh ka jaka, ka Ranikor Civil Sub-division ka kham heh hynrei ka jingbun paid ka kham bun ha ka thaiñ Mawsynram.
U la ong ruh ba ka jinglong jingman jong ka jaka ka pynjngai bha ïa ki paidbah sha ka Headquarter bad nalor kata ka thaiñ Mawsynram ka dei kaba don ruh bun ki jaidbynriew bapher bapher kum ki Koch, ki Garo, ki Bengalee nalor ki Khasi kiba dei ki trai shnong jong ka thaiñ Mawsynram.
“Na kata ka daw, la i donkam ban wanrah ïa ka Administration ka ban pynïajan sha ki paidbah bad dei tang ka Civil Sub-division kaba lah ban wanrah ïa ka jingsynshar kaba kham jan sha ki paidbah,” la pynpaw u Bah Suiñ.
Haba kylli, u la ïathuh ba u la ïakren bad u Myntri Rangbah ka Jylla halor kane ka mat bad ïathuh ruh ba u Myntri Rangbah u la pyntip ba yn sa ïakren bha ïa kane ka kam hadien ka Dorbar Synrai jong ka Ingdorbar Thawaiñ ka Jylla.
Shuh shuh u la pyntip ba ka la don ruh ka jingpynkhreh ïa ka Blue Print ha kaba ïadei bad ka jingdawa ïa kiba la phah sha ka ophis jong u Myntri Rangbah.
“Nga kyrmen ba kane ka Sorkar ba mynta kan don ïa ka mon ban ai noh ïa ngi ïa ka Civil Sub-division ban pynurlong ïa ka jingdawa ba la slem jong ki paidbah,” ula bynrap.
U la pynpaw ruh ba u kyrshan ïa ka jingïakhih jong ki sengbhalang namarba ka jingdawa ka jong ki ka long kaba shongnia.
