Shillong, Nailar,13: Uwei u Nongtrei jong ka Meghalaya Legislative Assembly, u la iap ha ka jaka shong hapoh ka ophis jong ka Assembly Press, ia kaba la suba jur ba u la iap na ka jingpyndonkam ban injek palat pud ia u drok.
Une u nongtrei jong ka Assembly ia uba la tip kyrteng u Lachuman Shrestha u dei ruh ba trei kum ka Chowkidar jong ka Assembly.
Ka thymmei khubor ka iathuh ba la lap ia kane ka jingjia da ki nongtrei jong ka Assembly Press ha ka step Lah Sngi u Blei, ha kaba ki la pyntip marmar sha ki Pulit ban pynlong ia ka jingtohkit bad ban leh ia kaba donkam katkum ki kyndon jong ka ain.
Katkum ka dur ba la shon, la lap ruh ia u thyrnia injek uba sahkut ha ka kti ka mon nalor u drok uba la phriang hajrong jong ka miej treikam.
Ia ka metiap jong une u Chowkidar la pynkit noh sha Civil Hospital Shillong ban pyndep ia ka post mortem bad ki Pulit ruh ki dang pynlong ia ka jingtohkit kaba bniah.
