Shillong, Nailar, 16: Ka Congress shen kan sa pynbna kyrtong na ka bynta ban pynïakhun ïa ka elekshon shiteng samoi na ka ban sa long ha Gambegre Constituency.
Ha ka jingïakren bad ki lad pathai khubor ha ka sngi Thohdieng, u President ka MPCC u Bah Vincent H. Pala u laong, “ka Election Commission kam pat pynbna ïa ka tarik hynrei ïa ka elekshon dei ban pynlong hapoh hynriew bnai naduh ka sngi ba la resaiñ namarkata la khihlynti ba ha u bnai Nailur ne Risaw, ka elekshon ka dei ban long.”
“Halor kane, ngi la shong jingïalang, ngi la bishar bha ïa ki kyrtong namarba ngi ladep ban khot thep kyrteng na Gambegre,” u la ong.
“Ngi la ïoh ïa ki kyrteng ba ladep thep bad ngin ym lah ban ïathuh ïa ka kyrteng hynrei ka Komiti kan sa phah shwa ïa kane sha Delhi bad ka AICC kan sa pynbna ïa ka kyrteng,” u la bynrap.
Shuh shuh u Bah Pala u la ïathuh ba ka Party da kawei ka sur ka la rai ban mynjur ïa ka kyrteng jong u kyrtong ba la tyrwa da u MP ka Tura u Saleng A Sangma.
“Baroh ngi la mynjur bad ngi don ka jingsngew skhem ba ngin jop ïa ka Gambegre Seat bad ki paidbah kumba ka long mynta ki don beit hapdeng ka jingïatylli,” u la ong.
Haba kynnoh ba ka NPP ka la pynkhein ïa ki aiñ jong ka ri, u Bah Pala u la ong, “la ïathuh ïa nga ba ka NPP bad ki Myntri Sorkar ki la ai da ka Cheque sha ki paidbah bad kane ka long pyrhah ïa ka aiñ. Ka dei ka jingpyrshang ban thied namarba ki kwah shaba palat ban jop namarba ki la rem ha ka elekshon Lok Sabha ha Garo Hills. Dei na kane ka daw ki pyrshang wat ban ïoh ruh ïa ki MLA jong ngi tang ban pyni ba ki MLA ka Congress ki la leit pynïasoh bad ki.”
Haba kylli, u Bah Pala u la ong ba ka Congress ka la pynkhreh bha bad ka don jingkyrmen ban dang ïoh bat biang ïa ka Gambegre seat.
