Shillong, Nailar, 17: Ka Mount Zions Secondary School ka la long ka kynhun ban ïohrah ïa ka nam lahduh hadien ba ka la pynliem noh ïa ka Green Hills Higher Secondary School ha ka jingïakhun phainal ha ka lympung ïalehkai 4th Independence Cup Football Tournament Tournament 2024, kaba la long ha ka Sngi Thohdieng ha ka shnong Sohryngkham.
Ka Mount Zions Secondary School ka la ïohrah ïa kane ka nam lahduh lyngba ka jingïashut Tie-breaker hadien ba ka jingïakhun ka la poi noh sha ka jingïakhaid.
Ïa ka Khusnam nongïalehkai ba kynsan tam la ïoh da u Samuel Lambha Mawthoh na ka Sunshine Secondary School bad ka Khusnam rang-ap Goal ba kynsai la ïoh da u Kelvin Lyngkhoi Khongwir na ka Mount Zions Secondary School.
Ha kane ka sngi ki don hynriew tylli ki skul jong ka thaiñ Sohryngkham kiba la wan ban ïashim bynta kiba kynthup ïa ka Sohryngkham Presbyterian Secondary School, ka Mount Zions Secondary School, ka Persara Secondary School, ka Sunshine Secondary School, ka Sohryngkham Secondary School bad ka Green Hills Higher Secondary School .
Ka Mount Zions Secondary School kaba la jop ïa ka nam lahduh ka la ïoh khur da ka song pisa kaba 15 hajar ryngkat ka Trophy katba ka Green Hills Higher Secondary School kaba wan baar ka la ïoh khur ïa ka khusnam kaba 10 hajar tyngka bad ka Trophy.
La pynhap pyrda ïa kane ka lympung ïalehkai da ka jingsakhi lang jong u Bah E. Kharmalki u ophisar IAS ba la shongthait uba la long kum u Kongsan ryngkat u President jong ka HANM Sengkmie u Bah Lamphrang Kharbani uba la long kum u Symbud Kongsan, ki nongïalam ka seng ba kynthup ïa u Bah Bawan Nongsiej, u Bah Wyraiwan Sohtun, u Bah Venus Rangslang, ki Nonghikai lem bad kiwei kiwei kiba la shah khot sngewbha.
