Shillong, Nailar 18: Ka Khasi Students Union (KSU) East Jaiñtia Hills District Unit ha ka sngi Saitjaiñ ka la hiar ban jurip ïa ki jingker sainar ba don ha shnong Lailong bad ban ai mynsiem ïa ki saw tylli ki Dorbar Shnong khappud kiba kynthup ïa ka lejri, Lahaleiñ, Huroi bad Hingaria
Ha u kyrwoh ba la phah da u Publicity Secretary ka Seng u Bah Hamewanpynhun Ryngkhlem, ka KSU ka la kam ba ki shipai BSF bad ki shipai ka BGB ki la ïoh jingbit ban siat beit ïa kino kino kiba jam sha shilliang u pud
jong ka ri India bad ka ri Bangladesh.
Ka jingleit ai mynsiem bad jurip ka long halor ka nongrim ban pyrkhing ïa ka jingrung beaiñ ki mynder na Bangladesh.
Ka seng ka la pynlong ruh ka jingïalang ha ka shnong Huroi ba la ïashim bynta da ki saw tylli ki shnong kiba mihkhmat da ki Waheh Shnong bad ki Secretary Shnong bad ki lai tylli ki shnat treikam ka seng naduh ka KSU Lejri Unit, KSU Huroi Unit bad ka KSU Hingaria Unit.
Ha kane ka jingïalang ka seng ryngkat ki unit bad ki Dorbar shnong ki lah ïoh ban ïathir bad mir jingmut ba kumno ban pyrkhing shuh shuh ïa ka jingwan rung ki mynder na Bangladesh sha u pud u sam jong ka ri.
Ha ka jingïakren bad ki dorbar shnong bad ki unit la sngewthuh ba haduh mynta ka jinglong jingman ha ki thaiñ khappud kiba kine ki dorbar shnong ki don, ka dang biang hynrei ka shu don tang ka jingjynjar ha ka kam khaïi pateng.
Ka KSU Hingaria Unit ka la pynsngew ba ha ka shnong Hingaria ki BSF kim shym la shong ha khappud hynrei ki shong shapdeng surok kaba jngai kumba 3 ne 4 kilomitar bad la pynpaw ruh ka jingeh ba na kine ki thaiñ ki ju kham ïoh rung bha ki mynderi na ka ri Bangladesh ha ki por ba la leit.
Na kane ka jaka ki la ju don ruh ki briew bad kynhun kiba long Dalal ban pynrung ïa ki mynder na ka ri Bangladesh da ka ïakren sngewthuh lyngba ki sbai rupa.
Ka seng shen kan sa hiar khnang sha kane ka thaiñ ban ïa syllok kyrpang bad kine ki shnong khnang ban lah ban pyrkhing ïa ka jingrung ki mynder.
Ka seng ha kane ka sngi ka la leit ban jngoh ruh ïa ki Border Out Post (BOP) Huroi bad Lailong bad ruh la ïoh ban ïamir jingmut bad ki heh ka BSF ba don ha kine ki BOP shwa ban jurip sha ki jaka ba la ker sainar shiah ha khappud.
Ha ka jingïakren bad u Sub-Inspector I jong ka BOP u la ïathuh ruh ba haduh mynta ym pat don ka jingrung hynrei kin ïai peit pyrman bha, u la ïathuh ruh ba shait don hi kita ki dalal kiba leh ïa kine ki kam pynrung briew na Bangla bad ïa kine lada lap yn leh tyngeh katkum ka aiñ.
Ka seng kan sa hiar rung sha ki katto katne tylli ki shnong khappud bad ka Bangladesh ha ki sngi ki ban wan kiba kynthup ïa ka Kuliang, Donaskur, Dona Umbluh Ampyrdit ha kaba kine ki long ki jaka kiba shait laitlan (Vulnerable) bha ki khar Bangla ban rung lyngba ki Dalal.
Ka seng kan ïai peit pyrman bad ruh kan ïai ai ka kti kamon kti ka diang ïa ki dorbar shnong ki thaiñ khappud, ka seng ka buh ruh ka jingmaham ïa ki paradoh parasnam jong kito ki shnong khappud ba kim bit satia ban rung shabar ka jingker ha khappud namar ba katkum ka jingïathuh ki BSF ba ki Bangladesh Border Guard (BGB) ki la ïoh jingbit ban siat beit kat kiba tam ïa u pud.
Ka seng ka la kam ruh ba ki shipai Border Security Force (BSF) jong ruh ki la ïoh jingbit ban siat beit ïa ki mynder na ka ri Bangladesh lada ki tam shapoh u pud jong ka Ri.
Kumta la kyntu ba ki paradoh para snam kiba don ha ki khappud ba kin husiar bad ban nym tam pud ïoh don ka jingjia ba sngewsih.
