Shillong, Nailar, 23: Haduh hynriew hajar ngut ki samla ki la ïoh jinghikai ha ka Computer ha ki san tylli ki samoi ai jinghikai da ka Ramakrishna Mission Shillong.
Ïa ka Convocation jong ka kynhun ba 106 ki samla ba la shah hikai pyntbit ha ka Computer bad ka kynhun ba 45 jong kiba shah hikai Language la pynlong ha ka sngi Thohdieng.
Ha kane ka prokram, kane ka jaka ai jinghikai ka la sam 921 tylli ki syrnot ïa ki shah hikai Computer bad language. Ka Ramakrishna Mission, Shillong ka ai jinghikai ïa kumba 6000 ngut ki samla ha ki sobjek computer, ha san tylli ki session.
Kane ka convocation mynta ka dei ïa kiba shah hikai na ka samoi pule jong u bnai Jylliew-Nailar 2024, ka kynhun ba 106 jong ki shah hikai kiba don kumba 1200 ngut na ki jylla bapher bapher jong ka thaiñ shatei lammihngi.
Ki khynnah kiba la wan shakhmat ki long ha ka Computer-Beginner ka Maya Boro, Intermediate –Mary Eugenia Suting; Tally-I –Amethyst M Basanshrieh; Tally-II Riya Das; DTP- Micheal Rynjah; Web Designing – Ïarilang Lyngdoh Nonglait; Python – Bapyndapbor Wahlang; DEO- Medarishisha L Ryntathiang. Ki khynnah ba la leh kham bha ki la ïoh ïa ki memento bad ar ngut ki shah hikai ha ka kyrdan jong kiba la pyntbit bha ki la ïoh ïa ka jingai sngewbha da ki Computer. Kine long ka Simran Khatun bad Pooja Basumatary.
Ka Kong Lucy Malngiang, Programme Executive, ka All India Radio, Shillong haba kren kum ka kongsan ka la kren shaphang ka kam jong ka Ramkrishna Mission ha kaba ïadei bad ka jingai jingsumar, ka pule puthi bad ka kam ai jingïarap bad ka la ong ba katba ki khynnah ki dang pyntbit ïalade ha kane ka jaka ai jinghikai, ki dei ban don ka jingngeit halade bad ki jingthmu kiba heh. Ka la ong ruh ba ki jingtbit ba ïoh na kane ka jaka ai jinghikai kin long kum ka nongrim na ka bynta ka por ba ki la sdang ban trei. Ka la ai jingkren shaphang ka jingïadei hapdeng ki paralok bad ka jingdonkam ban nang kumno ban ïoh ïa ki paralok ba thymmai.
U Swami Vedeshananda, Director, Academics jong kane ka jaka ai jinghikai u la kitbok kitrwiang ïa ki khynnah bad u la kyntu ïa ki ba kin pdiang ïa ki jingngeit jong u Swami Vivekananda khnang ba kin ïoh ïa ka jingjop ha ka jingim bad u la ong ruh ba baroh ki briew ki thaw hi ïa la ka lawei. U la ban jur halor ka jingdonkam ïa ka pule puthi bad u la pynshlur ïa ki samla ba kin don ka mynsiem ban seng kam lajong ha ka jaka ban shu ap ïa ka kam Sorkar.
U Swami Divyaswarupanandaji Maharaj, Centre-In-Charge, u la pynkut da kaba ai jingsngewnguh ïa baroh kiba ïadon bynta ha ka kam bad u la kren ïa katto katne ki ktien jong u Swami Vivekananda ha ka ktien Phareng bad ka ktien Khasi.
