Shillong, Nailur, 12: U MDC jong ka Nongthymmai Constituency u Bah Latiplang Kharkongor uba la long teng u Chief Executive Member (CEM) barim jong ka Khasi Hills Autonomous District Council (KHADC) u la khladnoh ha ka sngi Palei ha ka por 7:00 baje mynmiet hapdeng ka jingshah sumar ha Shillong Civil Hospital. Shwa kane, u la leit ban shah sumar wat shabar ka jylla.
U Bah Latiplang Kharkongor u la shah jied kum u MDC jong ka Nongthymmai District Council Constituency haduh saw samoi kynthih.
U la jop nyngkong eh ïa ka elekshon MDC ha u snem 2004 bad u la bteng ban long u MDC haduh kane ka khyllipmat ba un da khladnoh na kane ka sla pyrthei.
Ha ka jinglong MDC kaba la 20 snem kynthih, u Bah Latiplang u la bat shibun ki tnat ha ka por ba u long Executive Member ba kynthup ïa ka tnat Trade kaba la khihwin bha ha u snem 2014.
U la jop nyngkong eh ïa ka elekshon MDC na ka tiket jong ka Khun Hynñiewtrep National Awakening Movement (KHNAM) ha u snem 2004 bad bteng sa ha u snem 2009, 2014 bad ha u snem 2019 u la jop ïa ka elekshon MDC kum u MDC Independent.
U la long ruh u MDC Independent ba nyngkong eh ban ïoh shong ha ka Chief Executive Member jong ka Khasi Hills Autonomous District Council.
