Shillong, Nailur, 17: Ha ka jingther jong u lapbah uba la neh tang katto katne por, ka kynroh jong ka Don Bosco Technical School, Laitumkhrah kaba don mar syndah bad ka Divine Savior’s Higher Secondary School, Laitumkhrah, Shillong ka la twa kynan bad ka la ban ïa kawei ka kali kaba la pynieng harud surok.
La antad ba kane ka la jia ha ka por shiteng sngi 12:30 baje eiei. Kane ka kynroh kaba la twa ka dei na ka surok kaba wan Don Bosco Square,Laitumkhrah ban mih sha Lower Lachumiere.
Ka kali kaba la julor kham bun ka dei kaba don ïa u nombar AS01-EN-8084. Ha kane ka jingjia ym shym la don satia mano mano ruh ba mynsaw ne kano kano ka jingjia ba sngewsih.
Kane ka jingtwa jong kane ka kynroh ka la pynher syrngiew ïa ki briew kiba ju pynieng ïa ki kali sha lyndet jong ka Don Bosco Technical School, Laitumkhrah, Shillong namarba kine ki kali kham bun hi ki dei jong ki kmie ki kpa bad kiba kali kamai kiba kiba ju leit on bad leit shaw skul ïa ki khynnah skul kiba pule ha ki skul bapher bapher kiba don ha ka jylli jong ka shnong Laitumkhrah, Shillong.
Ïa ki synrum jong ka kynroh ba la twa la khat noh khnang ban ym pynwit ïa ka leit ka wan jong ki kali kiba ïaid lyngba na kane ka surok.
