Shillong, Nailur, 18: U nongai ktien jong ka National Peoples Party (NPP) Meghalaya u Bah HM Shangpliang ha ka sngi Balang u la pyntip ba u President jong ka NPP Meghalaya u Bah Prestone Tynsong uba long ruh u Symbud Myntri Rangbah ka Jylla u la mih noh na Apollo Hospital ha New Delhi hadien ba u la leit ban shah sumar na ka jinglang snam ha ka jabieng.
U la pyntip ba u Bah Prestone mynta u la leit sah shipor ha Meghalaya House, Delhi bad la khmih lynti ba un sa wan phai noh sha la iing ha Shillong ha ki khyndiat sngi ban sa wan.
U Bah Tynsong u la leit shah sumar nyngkong eh ha Nazareth Hospital, Shillong ha ka 9 tarik mynta u bnai bad la pynthiah ïa u ha Intensive Care Unit (ICU) na ka daw ka jinglang snam khyndiat ha ka jabieng. Ïa u Bah Prestone la sumar ha Department of Neurosurgery shwa ban pynkynriah noh sha Apollo Hospital, New Delhi ha ka 11 tarik mynta u bnai.
U Bah Shangpliang u la pyntip ba mynta u Bah Prestone u la ïoh biang ïa ka jingkoit bad la khmih lynti ba un sa bteng biang ban leit sha la ka kamram hadien ba la wan phai na ka jingshong jahthait shwa shipor ha Delhi.
