Shillong, Risaw, 03: U Secretary jong ka Bethany Society u Carmo Noronha ha ka sngi Palei u la ong ba ka bhah thungkam ba thymmai jong ka Jylla kam dei satia ban leh klet ïa ka bhah kyrpang kaba 4 percent ha ka thungkam thungjam na ka bynta ki briew kiba don jingduna ha ki dkhotmet ha ka jylla Meghalaya.
Hadien ba pynsngew hakhmat ka Expert Committee on the State Reservation Policy ha ka jingpynsngew paidbah (public hearng) kaba la long ha nongbah Shillong, u Noronha u la ong, “ki mat kiba ngi la pynsngew ki long ba ka State Reservation Policy ka dei ban ïaid ryngkat ryngkat bad ka Rights of Persons with Disabilities Act, 2016 bad kumjuh ruh bad ka Meghalaya State Policy for Empowerment of Persons with Disabilities.
Baroh ar tylli ki polisi bad ka aiñ kin dei ban pynthikna ba ka 4 percent ka bhah kyrpang ha baroh ki tnat treikam ka Sorkar ki dei ban mang kyrpang tang na ka bynta ki briew kiba don jingduna ha ki dkhotmet.
“Ka jingaiti jong ngi ka long ha kaba ïadei bad ka State Policy, ka State Policy kam lah ban shu leh klet ïa ka bhah kyrpang kaba 4 percent namarba ha kane ka kynti ka bhah kaba 4% ka sorkar ka la pyrshang ban bud hynrei ha ka jingshisha kam shym la bud ryntih kumba ka dei ban long bad ngi sngew ba ka thungkam thungjam wat ha ki district ïa ki briew kiba don jingduna ha ki dkhotmet ka dei ban long katkum ki kyndon jong ka aiñ bad katkum ka kyrdan pule bad ki kam ba lait na ka bynta ki kyrdan bapher bapher bad ka sorkar ka dei ban ithuh bad ban bud ryntuh ïa ka bhah kaba kyrpang…,” u la bynrap.
Haba kylli ïa ka jingdon jong ki briew kiba duna dkhotmet, Noronha u ong, “katkum ka khanasamari, ki don kumba 2.1 percent bad ngi ngeit ba ka lah ban tam ïa kata. Lada phi phi shim katkum jingkhein ha ka pyrthei bad kumta ter ter, hapdeng 8 haduh 10% hynrei ka Sorkar ka shim da ka jingkheiñ katkum ka khanasamari, kaba long tang 2.1%. Kane ka dei ka jingeh ha kaba ïadei bad ka jingithuh ïa ki briew kiba don jingduna ha ki dkhotmet.”
