Shillong, Risaw 16: U Bah H.B. Dan ba ju khot ieid Ma Ten uba la long teng u MLA barim jong ka Nartiang Constituency ula khlad noh na kane ka sla pyrthei ha ka step sngi Balang ha ïingsah ha Dulong, Jowai, hadien ka jingshitom kaba la bat la katto katne bnai.
U Bah H.B. Dan u la long teng u MLA jong ka Nartiang Constituency lah lai samoi kynthih ha u snem 1978 bad u la long ruh u kum u Myntri Khynnah ha ki snem 1988 bad 1998 u la long u Myntri ka Sorkar uba peit ïa ki tnat bapher bapher jong ka Sorkar Jylla. U la bat ruh kum u nongialam jong ka Liang Pyrshah ka Iingdorbar Thawaiñ.
U la teng kum u MDC la ar samoi bad u la bat ruh ïa ka kyrdan CEM jong ka JHADC la lai sien. U long ruh uwei na ki riew rangbah uba ju ai buit ai bor ha ka synshar khadar bad ka saiñ hima sima.
U long u Tymmen Basan jong ka Balang Presbyterian Nongjngi. Ula ieh noh shadien ïa ka kurim jong u, 7 ngut ki khun (4 shynrang bad 3 kynthei) bad ïa ki 19 ngut ki khun ksiew.
Ka sngi leit on tep ïa ka met ba dang sah kan long ha ka 18 tarik, Risaw, 2024 ha ka por 12 baje mynsngi.
Tang shu ioh jingtip halor kane, u Lamphang jong ka ïingdorbar Thawaiñ ka jylla u Thomas A Sangma bad ka Meghalaya Legislative Assembly Secretariat ki la pynpaw ïa ka jingsngewsih halor ka jingkhlad noh jong u Bah H. Britainwar Dan.
