Erwin K. Syiem Sutnga
Ha Ri Khasi Jaiñtia, ka Bri ki Hynniewtrep, ka synshar trai ri jong ngi ba pynshong nongrim ha ka mon kiba bun ba lang ki nongshong shnong ka ïaineh lyngba ka jingjied ki paidbah ïa ki nongsynshar ha la ki shnong kum ki Myntri Shnong, Sordar Shnong, Waheh Shnong, bad Rangbah Shnong bad kiwei kiwei ki nongkitkam shnong. Kine ki nongsynshar shnong, kaba ki kyrteng ki kyrdan jong ki, ki pher katkum ka jaka, ki don jingkitkhlieh ban pynïaid ïa ki kam pynïaid shnong, pynneh ïa ka riti ka dustur bad ka kam kaba ïa dei bad ka kam khyndew, pyntrei kam ïa ki skim sorkar ba pher ba pher, bad ban mihkhmat ïa ki shnong ha kaba ïadei bad ka ki ar tylli ki District Council bad sorkar. La pynkup bor ïa ki lyngbah ki sanad ba ki ai ki Khliehnongsynshar Hima bad Elaka kum ki Syiem, Lyngdoh Hima, ki Sirdar ki Elaka bad u Wahadar bad ki Dolloi katkum ki aiñ jong ki District Council la ha ki Ri Lum Khasi ne Jaiñtia. Phewse ngi ïohi ba la pynneh pynsah ïa ka rukom synshar tri ri kaba dei kawei na ki jingthmu ba kongsan ka Khyrnit ba Hynriew ne Sixth Schedule jong ka Riti Synshar Ri ha India. Ngi ïohi ba kine ki nongsynshar shnong bad ki Dorbar Shnong ki long ki rishot kiba khlaiñ ba ka Sorkar Meghalaya bad India ki donkam bha. Mynta ruh ngi ïohi ba ka jingpyntreikam ïa ki aiñ bathymmai kum ka Meghalaya Residents Safety and Security Act (MRSSA), 2016, ka jingkitkhlieh jong ki shnong ki thaw ka la nang khia bad ka la donkam ban pyrkhat thymmai ruh ha kaba ïa dei bad ka aiñ ka ban long ryntih ban ai bor ïa ki nongsyshar shnong bad Dorbar Shnong.
Khamtam haba ngi ïohi ïa ka jingjyllei u droks, ka jingrung kyrthep ki mynder ri bad ruh ba ki shnong ki thaw ki hab ban kitkhia bad kitkhlieh ïa kiba bun ruh ki bynta kum ka suk ka saiñ bad ka jingkhuid jingsuba. Ka jingpynkhlaiñ ïa ki nongsynshar shnong ka donkam ruh ïa ki jingtehlakam ba shongnia (checks and balances) khnang ban lait na ka jingpyndonkam bakla ïa ka bor. Ha u snem 2017 ha ka por ba nga ryngkat bad ka nongkitkam ka Synjuk ki Nongsynshar Shnong Bri u Hynniewtrep ngi ïa kynduh ïa u Rajnath Singh u ba dei u Myntri Korbar Ri ka India ha kato ka por, u la lyngngoh ba ki nongsynshar shnong ki jong ngi ki trei mon sngewbha ïa kane ka kam khlem jingsiew jingtda. Kane ka dei kawei na ki bynta ba long kyrpang ka synshar trai ri ka jong ngi.
Jinglong Nongsynshar Shnong kaba katjuh: Myntri Shnong, Sordar Shnong, Waheh Shnong, bad Rangbah Shnong ki don ka jingkitkhlieh kumjuh
Watla ki kyrteng jong kine ki nongïalam ki pher katkum ki jaka, hynrei ki jingkitkhlieh bad ka bynta jong ki ha ka synshar paidbah ki long kumjuh:
Myntri Shnong: Ki don ha ki elaka jong ka West bad South West Khasi Hills, bad ki shim bynta ha ka synshar shnong, pynbeit ïa ki jingïakhajia shong suk shong saiñ bad ban pyntrei ïa ki kam pynroi hapoh ki jaka shnong la jong. Ki mihkhmat ïa ka shnong ha kaba ïadei bad ka District Council bad ka sorkar.
Sordar Shnong: Ha ki jaka kum ka Hima Khyrim, ki khot ïa ki, ki Sordar Shnong . Ka jingkitkhlieh jong ki ka dei kumjuh kum ka jong u Rangbah Shnong.
Waheh Shnong: Ha ka Jaiñtia Hills District, ki Waheh Shnong ki don kumjuh ka jingkitkhlieh kum ki Rangbah Shnong ha Khasi Hills.
Rangbah Shnong: Ha kiwei ki bynta ka Khasi Hills, ithuh kum ki Rangbah Shnong.
(Na ka bynta ka jingsuk yn ong beit Rangbah Shnong ha kane ka jingthoh)
Ka kyndon pynkup bor ïa ki Rangbah Shnong: Ka jingshisha ka long ba watla ki kyrteng jong kine ki nongsynshar shnong ki pher na kawei ka jaka sha kawei, hynrei ka bor bad jingkitkhlieh jong ki ka long katkum ki kyndon ki sanad ba ki ïoh. Kawei n aka kyndon ba kongsan ka long ba kum kita ki nongsunshar shnong ki dei ban ïoh ïa ka jingshaniah ba pura ki nongshongshnong. Ki dei ruh ban kohnguh bad pyntrei kam ïa ki hukum na ki Khliehnongsynshar bad n aka Executive Committee ki Autonomous District Council ba synshar ïa ki. Ka don pat ka bynta ha kaba ïa dei bad ka Sorkar Meghalaya patde kaba donkam ban ïa kren bha. Ki Rangbah Shnong ki ïoh ïa la ka sanad na ka bor ba la ai da ka Khyrnit ba Hynriew kata hapoh ka Para 3(1)(g) bad la pyntrei kam ïa kane da ki Syiem, ki Lyngdoh, ki Sirdar, u Wahadadar bad ki Dalloi kiba ai ïa ka sanad ki Rangbah Shnong.
Ha Khasi Hills ki don bun tylli ki aiñ ïa ki Hima bad Sirdarship bad ha Jaiñtia Hills patde ki don mynta ka Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act 2015. Ha ki snem kiba la leit ngi ïohi ïa ka jing pyntrei kam ka Sorkar Meghalaya ïa ki Rangbah Shnong ha kiba bun ki bynta khamtam ha ka por ba mih jingkulmar bad ruh ha ki snem jong ka Covid pandemic. Lehse ka jingtrei ki Rangbah Shnong ka dei beit ha ka nongrim jong ka burom ym dei halor ki kyndon ka aiñ. Namar ba ki Nongsynshar Shnong la pynkup bor da ki sanad ki District Council lyngba ki Khliehnongsynshar ki Hima bad ki Elaka, hynrei ha ka kaba pynneh ïa ka Shong suk shong saiñ (Law and order) patde ka long kaba donkam eh ba kan don ka jingkieng ba pun ïa ka ka ophis ki Nongsynshar shnong bad ki Dorbar shnong bad ka Sorkar na ka District Council.
Ka jingthud ha ka synshar khadar ba ïa kynduh ki Rangbah Shnong bad ka Sorkar Meghalaya
Ki jingeh ne jingthud ba ki Rangbah Shnong ki ïa kynduh ha ka synshar bad jingïadei bad ka Sorkar Meghalaya ka mih namar ba ki Rangbah Shnong ki ïoh bor na ki District Council lyngba ki Khliehnongsynshar Hima bad Elaka ki bor kiba ai sanad, hynrei ki don ruh ha ka jingïadei bad ka synshar paidbah jong ka sorkar jylla. Kane ka rukom synshar kaba kynthup ïa ka synshar trai ri ba la pynshong nongrim ha ka riti dustur bad ka sorkar jylla ka wanrah ïa ki jingïatakhuh ha ka synshar, ka jingpyntrei kami ïa ka aiñ, bad ka jingeh ban pynkitkhlieh ïa ka ki jingbakla ha ka synshar khadar.
Ki bynta ba kyrpang jong ka jingïatakhuh:
Ka jinglong ar bynta ka Bor ki Rangbah Shnong: Ki Rangbah Shnong ki ïoh bor na ki District Council bad ki Khlieh Nongsynshar Hima kaba long ha ka nongrim ka synshar trai ri, ha kajuh ka por pat ki hap ban treilang hapoh ki aiñ ka sorkar jylla. Kane ka pynmih ka jingklumar ha kaba peit ïa ki kam synshar khadar, khamtam ha ki bynta kiba ïadei bad ka jingjyllei ka khaii bad dih droks, ka shong suk shong saiñ bad ki kam beaiñ. La khmih lynti ba ki Rangbah Shnong bad ki Dorbar kin the lakam ïa kum kine ki jait kam beaiñ hynrei ka aiñ kam kren shai ïa ka bor ka jong ki.Ynda poi ha ka bishar patde ïa kum kine ki kam pulom noh namar ba khlem pynkup bor da ka aiñ ka sorkar ïa ki Rangbah Shnong bad ki Dorbar Shnong.
Ka jingbymdon ka Aiñ kaba shai halor ki bor ki Rangbah Shnong: Ki bor jong ki Rangbah Shnong kim pat don ka jingthoh ba thikna ha ka aiñ, kaba plié lynti ïa kiba bun ki thliew ki syar ban pyndonkam bakla i aka bor. Khamtam ha kaba ai ïa ki No Objection Certificate (NOC) ne ha ki kam ïa die ïa thied jaka nalor kiwei kiwei. Ha kaba ïa dei bad ka kam khyndew ki ar tylli ki Autonomous District Council ki don la ki aiñ bat khyndew bad ïa kane donkam ba ki paidbah ruh kin shai.
Ka bor ka Sanad pyrshah ïa ka bor Sorkar: Ki Rangbah Shnong ki ïoh bor ba ai ki Khliehnongsynshar Hima lyngba ki sanad hynrei kim don pat kano kano ka aiñ na sorkar jylla kaba kren shai ïa ka bor ki Rangbah Shnong bad kumno ka sanad ka jong ki ka wandur sha ki kam jong ka Sorkar Meghalaya patde. Ha ka jingshisha kam don kano kano ka jing kieng kaba shai halor kane hapdeng ka Sorkar Meghalaya bad ki District Council ha kane ka jylla.
Ka Jingïadei Bad Ki Skhim Sorkar: Ki Rangbah Shnong ki ïalam ïa ki skhim sorkar kum ka MGNREGA bad kiwei kiwei, hynrei ka don ka jingkynnoh ba ka don ka jingpyndonkam bakla bad jingbymshai ha kaba pyllut ïa ka pisa sorkar. Ka don ruh ka jingkynnoh ba leh shilliang ha kaba pyntrei kam ïa ki skim bad ka aiñ kaba thikna kam don ban peit bniah ïa ki bad ban shim jingkhein ïa ka rukom pyntrei kam. .
Ka Jingdonkam ban pynshai ïa ki bor bad ki kamram ki Rangbah Shnong bad Dorbar Shnong:
Jingpynshai ïa ki kamram: Donkam ban pynshai ïa ki kamram jong ki Rangbah Shnong hapoh ka aiñ kaba shai ka ban long ka jingithuh ïa ki sanad ba ki ïoh na la ki Khlieh nongsynshar trai ri bad ka jingïadei bad ka Sorkar Meghalaya.
Jingïatreilang bad ki Pulit: Donkam ban thaw kdew shai ruh i aka rukpom ïatreilang bad ki pulit halor ki aiñ ki bapher bapher. Khamtam ha kaba dei bad ka shongsuk shong saiñ, ka jingpahara ïa ka jingdie droks beaiñ, ka rukom kem briew bad ka jingtalasi ïa ki ing ki sem bad kiwei kiwei.
Ka jingpyndonkam ïa ka bor ki Dorbar Shnong: Ka bor jong ka Dorbar Shnong ka dei kawei ka lad ban pynkhlaiñ ia ka jingpahara ïa ki kam bymman ha ki shnong ki thaw. Kumba leh ha ki shnong nongkyndong ha kaba ki don ki Village Defense Party, ha jaka sor ruh dei ban don ki Urban Village Volunteer Party ban peit ïa ka shongshngaiñ bad ban ïarap ïa ki pulit ban kem ïa ki nongleh kam bymman..
Ka jingïatreilang hapdeng ki rukom synshar trai ri bad ka Aiñ Sorkar: Donkam ban don ka jingithuh da ka sorkar ïa ki rukom synshar trai ri ki jong ngi da kaba don ka jingïatrei lang bad ki District Council nmar donkam ba ïa ki sanad ki Rangbah Shnong yn don jingïadei ruh bad ka Sorkar Meghalya ban pynthikna ba ki Rangbah Shnong bad ki Dorbar Shnong kin lah ban tehlakam ïa ki jingeh, ba kan shai ka rukom trei kam ka jong ki ïa ki skim bad ba ka synshar trai ri ka.
Ka nuksa: Jingpyntreikam ïa ka Meghalaya Residents Safety and Security Act (MRSSA), 2016
Ka Meghalaya Residents Safety and Security Act (MRSSA), 2016 ka kynthup lang ïa ki nongsynshar shnong (kum ki Rangbah Shnong, Sordar Shnong, Myntri Shnong, bad Waheh Shnong) bad Dorbar Shnong ban peit ïa ka jingshongshngaiñ jong ki nongshong shnong bad ban khmih ïa ki briew kiba wan sah na bar jong ka jylla. Kane ka aiñ ka la buh kyndon ïa ki kamram jong ki nongsynshar shnong bad Dorbar Shnong bad ki kynthup:
Jingpynrung kyrteng bad jingkhein ïa kiba wan sah na bar: Ki nongsynshar shnong ki dei ban pynrung kyrteng ïa ki briew kiba wan sah ne shongwai ha shnong, da kaba peit ïa ki kot ki sla bad ai NOC (No Objection Certificate) lada donkam.
Jingïatrei ryngkat bad ki Bor Sorkar: Ki nongsynshar shnong ki dei ban ïatrei ryngkat bad ki bor sorkar, ki pulit bad ki bor distrik ha kaba pynïaid ïa ka MRSSA, ban ai jingtip kaba ïadei bad ki briew na bar kiba wan sah ha shnong.
Pynneh ïa ka Jingshngaiñ ha Shnong: Ki nongsynshar shnong ki donkam ban pynneh ïa ka jingshngaiñ ha shnong, da ka jingwad bniah ïa kiba wan sah na bar bad ïa ka jingim jong ki.
Jingpynrung kyrteng bad jingpeit ïa ki kot ki sla: Ki nongsynshar shnong ki donkam ban pynrung kyrteng ïa ki nongshong shnong ba wan na bar ban shongwai bad ban peit bniah ïa ki kot ki sla kiba ïadei bad ki briew na bar, khnang ba ka jingtip kan long kaba shisha bad kaba shai.
Jingpynbeit jingïakajia:Ki nongsynshar shnong ki don ka bynta ba kongsan ban pynbeit ïa ki jingïakajia hapdeng ki nongshong shnong tynrai bad kiba na bar ban pynneh ïa ka jingsuk bad ka jingïasngewthuh jingmut.
Ka jingujor pyrshah ïa ki jingpyndonkam bakla: Lad ban ujor pyrshah: Ki nongshong shnong kiba sah ha shnong ne kiba wan na bar ki don ka lad ban ujor pyrshah lada don jingbakla ha ka rukom pyntreikam jong ki nongsynshar shnong ïa ka MRSSA .
Jingpeit bniah ïa ki kot ki sla bad jingtip ba bniah: Ki bor distrik kin pynpeit bniah ïa ki kot jingpynrung kyrteng ha man la ka por.
Jingïatreilang bad ki paidbah: Ka jingpyntreikam kan long lyngba ka jingïatreilang bad ki paidbah bad ka Dorbar Shnong ban ïada na ka jingpyndonkam bakla ïa ki bor.
Kine ki jingkitkhlieh ki ïarap ban pynïaid beit ïa ka jingpeit ïa kiba wan sah na bar hapoh ka jingpeit jong ki nongsynshar shnong ha ka jingpyntreikam jong ka MRSSA. Ka donkam ba ki shnong ki thaw kin pyntrei kam janai bad ka Sorkar Meghalaya ka hab ban ai ka jingkyrshan kaba khlaiñ khamtam ba ka wi fi connection sha ki shnong ka dei ban long ka ba thikna bad ka online rejistrashon ka dei ban long kaba suk ban pyndap.
Ki nongïalam shnong kum ki Myntri Shnong, Sordar Shnong, Waheh Shnong, bad Rangbah Shnong bad ki Dorbar Shnong ki long ki nongsynshar shnong kiba don bynta ha ka synshar shnong kaba ïadei bad ki nongshong shnong ha Meghalaya. Ki don ka bynta kaba khraw ha ka jingpynïaid shnong, ban pynneh i aka suk ka saiñ, bad ka jingpynneh pynsah ïa ka rukom synshar trai ri ka jong ngi. Kine ki bor bad ki jingkitkhlieh jong ki la pynwandur hapoh ki sanad. Hynrei ki jingkitkhlieh jong ki hap ban don bad ki kyndon ban shim jingkhein (checks and balances) ban ïada na ka jingpyndonkam bakla ïa ki bor.
Namar ba ka Sorkar Meghalaya ruh ka donkam bha ïa ki Rangbah Shnong bad ki Dorbar Shnong te ka donkam ba kan don ka jingïatrei kam kaba shai bad ki Autonomous District Council. Ïa kane ngi kmih lynti ba kan sa don ka pyrkhat thymmai namar ba kumba donkam ba kan beit ka synshar khadar donkam ruh ba ki Rangbah Shnong kin don ka jingïada ka aiñ bad ka jingkdew kaba shai ïa ka bor jong ki bad ki Dorbar Shnong ha kine ki por ba kylla stet bad ba don bun ki jingdawa na ki paidbah ïa ka synshar khadar kaba kyntiew i aka shong suk shong saiñ, kaba ïada ïa ka jaidbynriew bad kaba wanrah ïa ka roi ka par.
