Ka jingkwah pynlong ka sorkar Meghalaya lyngba ka jingpynbna sorkar (official notification) mynshem snem kaba la bthah ïa ka Meghalaya Board of School Education (MBoSE),Tura ba ka dei ban pynlong ïa ka eksamin SSLC ha u bnai Nohprah ka la urlong shisha mynta u snem ha kaba ka MBoSE ka la pynmih syndon da ka routine jong ka eksamin ka ban sdang naduh 4 tarik haduh 16 tarik, Nohprah, 2026.
Ha ka jingshisha, kane kadei ka sien kaba ar ba ka MBoSE kan pynlong eksamin ha u Nohprah.
Ha ki snem 1984, 1985 eiei ka MBoSE ka la pyrshang (trial) ïa ka HSLC Exam. (ka eksamin ha kito ki por), hynrei kam long bad ka sa phai biang sha ki bnai Rymphang bad Lber eiei.
Katkum ka jingpynbna ka MBoSE, ka tarik ba khatduh ba ki skul bad ki khynnah kiba kwah ban ïaleh ïa ka eksamin SSLC 2026 kin pynrung kyrteng (Online system) ka long ha lane shwa ka 25 tarik, Nailur 2026. Lada don kiba slem pyndap Form palat ïa ka tarik, ki khynnah kin hap siew bai kuna slem (late fine) sa T. 400 na ka bai eksamin ba la buh.
Kumba ka long mynta, don ki skul kiba ladep pynlong ïa ka Selection Test. Don pat kiba dang ïaid shakhmat. Don ruh ki ban sa ai result la shem taiew katkum ka jingpynbeit jong ki bor pynïaid skul bapher bapher.
Ki Candidates Regular-2 bad ki Private Candidates (Private with Selection Test) ha East Khasi Hills ki ladep ïoh result naduh ka 11 tarik, Nailur, 2026 katkum ka jingpynbeit jong ka ophis DSEO, East Khasi Hills District, Shillong. Hynrei, ki lynnong pat ban pyndep lut, ïa ka course SSLC dang bun ki skul ki ban dang pyndep nangne shakhmat lait noh, tharai, tang ki katto katne ki skul kiba kham kloi ne sted ki la lah ban pyndep Course ha kine ki bnai. Ka daw ka long ba bunbah ki lynnong ba dei ban pyndep ne leh hapoh ka por kaba lyngkot pat.
Ka jingkylli mynta ka mih, hato! ka biang neem ban pynlong ïa ka eksamin SSLC ha u bnai Nohprah? Mynshem snem ha ka jingïalang ba la khot da ka MBOSE ïa ki bor pynïaid skul baroh ban pan jingmut halor ka jingpynlong ïa ka eksamin SSLC ha u bnai Nohprah, ki nonghikai bad ki bor pynïaid skul ki la ïa ai ïa la ki jong ki jingai jingmut. Don kiba kyrshan bad don ruh kiba pyrshah. Kiba kyrshan ki ong ba ka biang bha namarba ki khynnah ki dang lah ban kynmaw bha ba ki dang shu dep long skul.
Ka jingpynbeit paper (Evaluation) ki ong dei ban leh tad haduh u bnai Kyllalyngkot syndon namar u bnai Nohprah u dei u bnai lehkmen (festive month). Ki skul kin ïaid beit naduh u bnai Rymphang eiei khlem kano kano ka jingpynwit ne pynthut shuh. Ki don ruh ki bym ïahap satia namar u bnai Nohprah u dei u bnai ba ki bunkam ban pynbeit paper ïa ki eksamin ïa ki klas bapher bapher haduh Class-IX. Bun ki nonghikai ki kwah pynlut ïa ki por shuti jong ki ha kiwei kiwei ki kam ba ki kwah pyllut. Hynrei kaba kham kongsan eh ba ki pyrshah ka long ba ki National Boards kum ka ICSE,CBSE bad kiwei kiwei kin sdang baroh ïa ki eksamin jong ki ha u bnai Lber eiei bad ka result kin ïoh haduh u bnai Jymmang eiei bad ka jingpule kaba thymmai jong ki pat kan sdang naduh u bnai Jylliew.
Lada ka MBOSE kan pynbna ïa ka result ha u bnai Lber, kata ki khynnah kin hap ban ap kai haduh 3 ne 4 bnai ïa ki klass ba thymmai jong ki. Lada ki khynnah na Meghalaya kiba ïakhun ïa ka eksamin ba la pynlong da ka MBOSE kin sdang shong ing naduh u bnai Nohprah haduh u bnai Jylliew, kata kin shu bthi kai ka jabieng jong ki? Kumno ki khynnah Meghalaya kin sdang long klass hi naduh u Lber, ne Ïaïong, haba ki khynnah jong ki Central Board pat kim pat ïoh result satia? Hato! Ka long seh ban pynlong klas tang ïa ki khynnah kiba pas na MBOSE khlem ki khynnah na Central Board? Kumno ki khynnah kiba kwah ban leit pule shabar ka jylla kin hap ban ap shitom haduh u bnai Jylliew namar shabar ki klas thymmai bun hi kin sdang naduh u bnai Jylliew ter ter.
Kine ki long ki katto katne kiei kiei kiba ka Sorkar Meghalaya kan hap ban pyrkhat sani bha ïoh ba ka long pynban ka apot, ka jingjynjar bad ka jingduhnong ne ka jingduh jingkyrmen pynban ïa ka jingpule (academic career) jong ki khun ki kti jong ngi.
