Shillong, Naiwieng, 03: Ka Meghalaya Power Distribution Corporation Limited (MePDCL) ka la pyntip paidbah kan pynlip ïa ka bording na ka bynta hynriew sngi kynthih, kata naduh ka 4 tarik, Naiwieng haduh ka 9 tarik Naiwieng naduh ka por 9:00 baje mynstep haduh ka por 3:00 baje noh phai sngi na ka jingshna thymmai ïa ka KV line ha Mawlyndep.
Lyngba ka jingpyntip paidbah, ka MePDCL ka la ïathuh ruh ba ki jaka ki ban sa shah ktah na ka jingmaramot ïa ka 33KV MES Feeder ki kynthup ïa ka MES Assam Regimental Centre, Assam Rifle Office Complex, Assam Rifle Residential, MES Hospital, PGCIL, NERPC, NERLDC, Anthropological Survey of India, baroh kawei ka shnong Happy Valley, Mawshbuit, Madanrting, Wahrynthi, Laitkor Wahkdait bad kynthup ruh ki jaka ba marjan.
Ki jaka ban sa shah ktah ha ka jingpynlip bording na ka jingshna ïa ka 33KV Lad Smit Feeder ki kynthup ïa ka DGAR, Umphynai, Sohryngkham, Mawryngkneng, Mawlyndep, Puriang, Smit, Nongkrem, Thangsning, Jongsha, Mawkynrew, Kharang bad ki shnong ba marjan.
Ka MePDCL ka la pynpaw ba kan sa trei pyndep noh kham kloi katba lah bad ka la kyntu ruh ïa ki paidbah ba kin long kiba ïaishah katba ka jingtrei ka dang ïaid shakhmat.
