Shillong, Naiwieng 05: Ka Hynñiewtrep Youths Council ka la rai ban ïaid beit shakhmat ban pynlong ïa ka jingïalang paidbah ha Motphran ha ka 7 tarik mynta u bnai hadien ba u Myntri ka Sorkar Jylla uba khmih ïa ka tnat Social Welfare u Bah Paul Lyngdoh u la khot ïakren ïa ki nongïalam jong ka seng ha ka sngi Baar hadien ba kane ka kynhun ka la pynbna ban tur paidbah sha Secretariat ban dawa ïa ka Sorkar ban pynurlong ïa ki hynñiew tylli ki mat jingdawa ban iakhun pyrshah ia ka jingjyllei jong u drok hapoh Meghalaya.
Ha ka jingïakren bad ki lad pathai khubor u President jong ka HYC u Bah Roy Kupar Synrem u la ïathuh ba ha ka jingïakren bad u Myntri ka tnat Social Welfare u Bah Paul Lyngdoh u la ïathuh ba bun na ki mat jingdawa ka Sorkar ka la kular ban pynurlong hapoh ka Drug Reduction Elimination and Action Mission (DREAM) bad ïathuh ruh ba ka seng kan ap shwa ïa ka rai kaba mih na ka jingïalang banyngkong eh jong ka Drug Reduction Elimination and Action Mission ban sa pynïaid da u Symbud Myntri Rangbah uba khmih ïa ka tnat Kam Pohïing ka Sorkar Jylla u Bah Prestone Tynsong ka ban long ha ka 14 tarik mynta u bnai.
“Ha ka 4 tarik u Risaw ngi la thoh sha ka Sorkar bad sha u Myntri ka tnat Social Welfare u Bah Paul Lyngdoh ban pynpaw ha u halor ki 7 tylli ki mat jingdawa jong ka seng bad ha ka jingïalang kaba la long mynta ka sngi, ka sorkar ka la ïathuh ba ka la shim ïa ki sienjam ban pynurlong ïa kiba bun ki jingdawa ba la buh hakhmat da ka seng,” ong u Nongïalam ka HYC
U Bah Synrem u la bynrap ruh ba ka jingïalang ka ban long ha ka 7 tarik ha Motphran kan ïaid beit kumba ladep pynbna bad ka jingtur sha Secretariat yn ap shwa ia ka rai kaba mih na ka jingialang jong ka DREAM ka ban sa long shen.
