Shillong, Naiwieng, 12: U Jostview D. Sangma uba sah ha ka shnong Jembragre u la mudui da ka ejahar ha u Officer in Charge jong ka Damalgre Police Station pyrshah ïa u MDC ka Boldamgre u Stevie Marak halor ka jingkynnoh ba une u MDC u la ktah kti bad byrngem pyntieng ruh da ka pistol ïa ki paidbah.
Ha ka ejahar, u Jostview Sangma u la pyntip ba kane ka la jia ha ka miet shiteng synñia sngi Baar ha ka por kumba 1:00 baje mynstep ha ka shnong Jembragre katba ki nongshong shnong ki dang ap miet ban khanglad ïa ki briew jong ki seng saiñ pyrthei kiba thmu ban rung shapoh ka shnong bad ban sam pisa sha ki paidbah.
U Jostview u la pyntip ruh ba ym tangba u Stevie Marak u la ktah kti hynrei u la sei ruh da ka suloi ban byrngem pyntieng ïa ki paidbah.
“Katkum ka aiñ jong ka Election Commission of India la khang pyrshah ban pynlong jingïalang paidbah ne ban rung sha ki thliew iing jong ki briew ha ki kynta ba la pynbna kum ka ‘silent period” hadien ba la kut noh ki kynta ban ïalap elekshon naduh ka 4:00 baje janmiet jong ka 11 tarik, Naiwieng 2024,” ong u Jotsview.
U Jotsview u la ong ruh ba kane ka jingleh jong u Stevie Marak ka la pynpaw shai kdar ba u la pynkheiñ ïa ki kyndon ba la bthah da ka Election Commission of India (ECI)
Shuh shuh, u la pynpaw ba hapoh ki kyndon jong ka Arms Act baroh ki suloi ba la ïoh laisen la dei ban leit aiti noh sha ki Police Station hashwa ka elekshon khnang ban lait na ki jingpyndonkam bakla hynrei da kaba buh ha lade ïa ka suloi ha ka por ba la mana, u Stevie Marak u la pynkheiñ ïa ka aiñ ba la bthah da ka Election Commission of India (ECI) bad ïa ki kyndon jong ka Arms Act.
U Jostview u la kyrpad ïa ki Pulit ban register case ïa ka ejahar ba la mudui pyrshah ïa u Stevie Marak bad ha kajuh ka por u la kyrpad ruh ba dei ban pynduh noh ïa ka laisen bat suloi bad ban pynshitom pyrshah ïa une u MDC katkum ki kyndon jong ka aiñ.
