Shillong, Naiwieng, 13: Ka Hynñiewtrep National Youth Front (HNYF) ha ka sngi Balang ka la kynnoh naduh ba ka BJP ka la ïohbat ïa u lakam synshar hapoh ka ri India ka la pyrshang ban thung da ki dkhot ka RSS kum ki khlieh ha ki skulbah bapher bapher jong ka ri India.
“Naduh ba ngi la ïohsngew ba ka la don ka jingïakhih pyrshah ïa u Vice Chancellor (ka skulbah NEHU), ngim dei ban peit tang ïa ka NEHU. Naduh ba ka Sorkar BJP ka la bat ïa u lakam synshar ka la pyrshang ban thung da ki briew lajong bad nga lah ban ong ba ka la pyrshang ban thung da ki dkhot RSS kum ki khlieh jong ki skulbah,” la ong u President ka HNYF Bah Sadon Blah haba kren sha ki lad pathai khubor hadien ka jingïakynduh bad ai mynsiem ïa ki samla pule ka skulbah NEHU kiba pynlong ïa ka jingshah thngan la phra miet khyndai sngi kynthih.
Haba pynksan ïa kane ka jingkren jong u, u Bah Sadon Blah u la ong, “dei kane kaba pynlong ïa une u Vice Chancellor (Prof. PS Shukla) ba un eh dohnud bad un shlur haduh katne katne tangba un sngew un sngap ïa ka jingud jingnam jong ki samla pule bad ki nonghikai ruh um patiaw shuh bad ha kajuh ka por ka Sorkar Pdeng ruh kam patiaw shuh namarba ka dei ka jingpyrshang ban pynrung ïa ka niam Hindu hapoh ki shlem pule ha ka ri India baroh kawei.”
Da kaba kynthoh ïa ka jingjia hapoh ka skulbah NEHU u Bah Sadon u la ong, “kane ka ladei ka jinglehkai jong ka Sorkar Pdeng, ka Sorkar Jylla, u Vice Chancellor ïa ka pule puthi hapoh kane ka skulbah, namarba ki samla kiba wan pule hangne ki kwah ban pynkiew ïa ka lawei pule jong ki, hynrei ka jingleh mutlop jong u Vice Chancellor, ka Sorkar Pdeng bad wat ka Sorkar Jylla ruh kam kynthoh eiei ka pyni ba ka NEHU nalor ba ka la hiar lypa ha ka kyrdan ka pyni ba ka jingleh jong ki kan ym phalang da kumwei pat hynrei kan nang pynhiar kyrdan shuh shuh ïa ka skulbah NEHU bad kan long ka jinglehraiñ ïa kane ka skulbah bad ka jylla baroh kawei.”
Haba kylli, u la ong ba ka seng kan thoh sha ka Ministry of Education ka Sorkar Pdeng ba dei ban shimkhia ïa kane ka kam katkum ka jingkwah jong ki samla pule hadien ba la lap ïa ki kynrum kynram ha ka rukom pynïaid ïa ka skulbah bad ong ruh ba ka seng ka dawa ba u Vice Chancellor ba un hiar shuki mardor.
U la kam ruh ba ka jingthung Vice Chancellor ïa u Prof. PS Shukla kumba la paw ha ki lad pathai khubor ka la bakla lypa bad nalor kata u la kynnoh ruh ba u Prof Shukla u la thung kam sa da ki “Yes Man” ne ki ñiangkohnguh ha manla ki bynta bakongsan jong ka skulbah NEHU. “Kane pyni shai ba ka don ka daw shalyndet jong kane ka baroh namarba dei tang ka NEHU ka shlem pule jong ka Sorkar India kaba don ha ka jylla jong ngi bad ki shim kabu ïa kane lah ban ong ka jingleh shiliang khmat ka jur bha, ka bamsap ruh ka jur bha hangne,” la bynrap u Bah Sadon.
