Shillong, Naiwieng, 15: U Myntri Rangbahduh ka ri India, u Narendra Modi ha ka sngi Thohdieng u la buh ïa u mawnongrim na ka bynta ban tei ïa ka Eklavya Model Residential School (EMRS) ha ka shnong Domjyrti, kaba jngai 8 kilomitar eiei na ka shnong Mawkyrwat, South West Khasi Hills District ïa kaba u la pynbna lyngba ka ‘video conference’.
Kum shi bynta na kane ka prokram ba la pynlong ha baroh kawei ka ri, u Myntri Rangbahduh u la plie ruh ïa ki 10 tylli ki skul Eklavya bad u la buh ruh ïa u mawnongrim na ka bynta ki 25 tylli ki skul Eklavya, kynthup ïa kane ka kawei ka skul ban sa tei ha ka shnong Domjyrti.
Ha ka jingbuh ïa u mawnongrim, la pynlong lyngba ka Video Conferencing ha Multipurpose Hall ha kaba la sakhi lang da u MLA jong ka Mawkyrwat u Bah Renikton L. Tongkhar, u Deputy Commissioner jong ka South West Khasi Hills District u Bah Bah Barnari Mawlong, u Superintendent of Police jong ka South West Khasi Hills District u Bah G.D. Kharwanlang, u Additional Deputy Commissioner u Bah L.T. Tariang bad kiwei pat ki heh ophisar na ki tnad treikam bapher bapher jong ka district, ki nonghikai bad ki samla pule.
