Shillong, Naiwieng 15: Namarba ba don biang ka jingud na ka liang ki paidbah ba don ki briew kiba pyndonkam ïa ki rukom khwai doh da kaba pynbthei bom, ki dawai bih, jar khang, den sla, pynap khriah khongpong pynap khoh, ka sdad um, pynap bilor, tbeh torchlight, tong tynsong por mynmiet, khang kwar, bret jar bad kiwei kiwei ki rukom khwai doh kiba pynsaja ïa ki kynja kiba im hapoh ka wah Umsong kaba hab hapoh jong ka Pynursla Civil Sub Division jong ka East Khasi Hills District.
Naba kine ki jingleh jong ki kan wanrah ïa ka jingduhjait ki dohkha bad kiwei pat ki kynja ba im hapoh ka um bad nalor kata kan wanrah ruh ïa ka jingma ïa ka koit ka khiah jong u paidbah.
Katkum ka bor ba la pynkup hapoh ka kyndon aiñ Section 163 BNSS ka District Magistrate jong ka East Khasi Hills District Kong Rosetta Mary Kurbah ka la pynbna paidbah ba la khang bad mana tyngeh ban pyndonkam ïa ki rukom khwai da kaba pynbthei bom, ki dawai bih, jar khang, den sla, pynap khriah khongpong, pynap khoh, ka sdad um. pynap bilor, tbeh torchlight.
khang kwar tong tynsong por mynmiet, bret jar bad kiwei kiwei ki rukom khwai doh kiba pynsaja ïa ki kynja kiba im jong ka wah Umsong kaba hab hapoh jong ka Pynursla Civil Sub Division jong ka East Khasi Hills District.
“Kum ki bor ba dei peit ïa ki shnong ki thaw, nga kyrpad ba lada phi lap ne tip ïano ïano baleh ïa kitei ki jait kam kumba la kdew haneng sngewbha ban pyntip kloi sha kane ka ophis bad yn pynshitom ïa ki katkum ka kane ka hukum kan treikam mardor naduh ka 14 tarik u Naiwieng 2024 tad haduh ban da pynbna da kumwei pat,” ong ka District Magistrate.
