Shillong, K’lyngkot, 03: Ka Thma U Rangli-Juki (TUR) ha ka sngi Saitjaiñ ka pynpaw ïa ka jingpyrshah bad ka ïeng ban kynthoh jur pyrshah ïa ka jingkren lap lah jong u Myntri ka tnat pule ka Sorkar Meghalaya u Rakkam A. Sangma ha kaba u la pynbna ba yn pynlong da ka jingïaseng Khristan ha ka por ba plie ïa ka skulbah kaba nyngkong jong ka Jylla, kata ka Williamson Sangma State University, na ka daw ba ka Meghalaya ka dei ka Jylla Khristan.
“Ka TUR ka pynpaw bad ka pynkynmaw ba u Rakkam Sangma, kum u Myntri u la bam smai ban pynneh bad ïada ïa ka Riti Synshar bad ïa ki nongrim tynrai jong ka. Kumta ka jingkren jong u ka la pynkheiñ ïa ki kyndon ka Riti Synshar. Ka jingthmu ban pynlong da ka jingïaseng Khristan ha ka sngi ba plie ïa ka Skulbah ka dei ban sangeh shi syndon bad u Myntri u dei ban shim biang ïa ki kyntien ba u la khlei bad panmap na ki nongshong shnong ka Jylla,” la dawa ka TUR na u Myntri ha u kyrwoh ba la phah sha ki lad pathai khubor.
Ka TUR ka khot ka wer ïa ki nongshong shnong bad kumjuh ki sengbhalang bad ki seng saiñhima ban pynrem ïa ka jingkren shitniam jong u Rakkam Sangma bad ban ïatrei lang ban ïada ïa ka Riti Synshar bad ki nongrim jong ka.
Ka jingkren jong u Myntri ka Sorkar Jylla ka long ka bym shong nia bad ka pynkheiñ ïa ki kyndon bad nongrim tynrai jong ka Riti Synshar (Constitution), ong ka TUR ha u kyrwoh.
Nyngkong eh, ka Jylla Meghalaya ka lah ban dei ka Jylla ha kaba kiba bun tam ki nongshong shnong ki dei ki Khristan kiba don ha ki Balang Khristan kiba pher bad kiba ïapher kawei na kawei pat. Hynrei ka jingbun paid kam lah ban pynlong ïa ka Jylla kum ka Jylla Khristan bad ym lah ban pynkylla Jylla Khristan ïa ka Meghalaya halor ka nongrim jong ka jingbun paid. Ka long kaei kaei kaba bakla bad be-aiñ ban leh kumta, ong ka TUR.
Kaba ar, ka Jylla bad ki tnat treikam bapher jong ka Sorkar ne ka Ri kiba don ha baroh kawei ka Ri India ki dei ki tnat ne ki bor treikam ki bym lah ban pynïasoh bad kano kano ka niam ne ka jingngeit. Kine ki dei ban trei ne pynïaid ïa ki kam jong ki katkum ki kyndon jong ka Riti Synshar ka Ri India. Kumta ka jingkren jong u Rakkam Sangma, ka long pyrshah ïa ka Riti Synshar, la kynthoh ka TUR.
Kaba lai, ka skulbah jong ka Jylla ka dei kaba la seng bad bei tyngka da ka pisa paidbah bad kumta kam dei ban pynïasoh ne shah pynïaid ha kano kano ka kynhun Niam ne Balang ne jingngeit lym kumta kan ym lah satia ban ai ki jinghikai kaba laitluid sha ki samla pule bad kan ym roi ne san lano lano ruh,” la kynthoh shuh shuh ka TUR.
Hapoh ka Jylla Meghalaya ki don shibun ki kynhun Balang ne seng niam ne kynhun jingngeit kiba pher bad ïapher. Kine ki seng ne kynhun ki la im bad san hapoh ka Jylla, kaba kynthup ïa ki niam tynrai, kum ki Sonsarek, Niam Tre bad Niam Khasi. Ka jingkren jong u Rakkam Sangma ka dei ka jingkheiñ dewthala bad ka jingbymsuidñiew ïa kine ki kynhun jingngeit ne niam kiba don kijuh ki hok katkum ka Riti Synshar jong ka Ri. Ym tang katta, ka wanrah ruh ïa ka jingsngewïapher kaba lah ban ïalam sha ka jingïapait hapoh ki jaitbynriew trai ri kiba don ha Meghalaya, la ong ka TUR.
“Ka shai kum ka sngi ba ka Sorkar Pdeng hapoh ka jingïalam jong ka BJP ka pyrshang ban pynsngewthuh bakla bad leh ki kam ban pyni ba kam don jingïapher lane ba kam don kano kano ka jingmynsaw ban leh ïa kino kino ki kam ne ban pynïasoh ïa ki kam Sorkar ne ki tnat treikam jong ka Sorkar bad ka Niam ne ki jingleh niam jong ki heh paid Hindu,” la bynrap u kyrwoh.
“Hooid, pylleiñ pylleiñ ngi sakhi ba ki pukir, ki lyngdoh niam jong ka niam heh paid Hindu ki ïashim bynta bad pynlong ki jingdwai ryngkat ka kñia ka khriam da ka rukom jong ka Niam Hindu ha ka por ba plie ïa ka ïing Dorbar Thaw Aiñ ne ka Parliament kaba thymmai. Kane kam mut pat ba hangne ha ka Jylla Meghalaya, ka Jylla kaba bun tam ki Khristan, ngi lah ban leh kumjuh da kaba pynlong da ka jingïaseng ne jingdwai Khristan ha ka por ba plie ïa ka skulbah ne ha kiwei pat ki prokram ba pynlong da ka Sorkar. Ka aiñ tynrai jong ka synshar paidbah bad ka dak ba kum ka Jylla ngi lah ban pynpaw ba ngi la san bad khraw mynsiem ka long ba ngin kyntait ïa ki kam ne ki saiñpyrkhat jong ki kynhun ne ki riew shitniam, ym ban ïabud ne leh kumjuh. Kaba sngewsih ka long ba u Rakkam Sangma, u Myntri ka Sorkar Jylla, u bud thik ne pyrthuh ïa kaei ba ka Sorkar BJP ka leh ha kaba ka pyrshang ban thombor da ka jingngeit ne ka niam Hindu ha kylleng ka Ri India,” takraiñ ka TUR ïa u Myntri ka tnat Pule Puthi ka Sorkar Jylla.
