Shillong, K’lyngkot, 05: Ka Seng Kur Lyngkhoi Seng Kmie ha ka sngi Saitjaiñ ka la pynlong ïa ka dorbarbah kaba ar ha ka shnong Mawten ha kaba da ki hajar ngut ki la poi na ki distrik bapher bapher kiba don hapoh ka jylla.
Ha kane ka dorbar bah la ïashim bynta da ki longkpa, ki longkmie, ki khun samla bad ki hep barit.
La pynïaid ïa kane ka dorbar da u President u Bah Spailar Lyngkhoi bad la pynphuh pynphieng ïa kane ka dorbar da ki prokram bapher bapher ba la ïashim bynta da ki heprit na South West Khasi Hills District ha ka jingrwai ba kyrpang, ka jinglehkai skit na ka Siejlieh Circle bad ïa ka kaiphod treikam jong ka Seng Kur Seng Kmie la pynsngew da u General Secreatay u Pastor SB Lyngkhoi.
Nalor kata, la pynsngew ruh ïa ka kaiphod treikam jong ka Seng Kur Lyngkhoi na ki District lyngba ki Secretary.
Ka dorbar bah jong ka Kur Lyngkhoi ha kane ka Sngi ka la pynbna ban pynkup burom ruh ïa ki para kur Lyngkhoi kiba wanrah nam ïa ka Jylla bad kiba wan shakhmat ha ki eksamin bapher bapher ïa kiba yn sa pynlong ha ki snem ki ban sa wan.
Ki Nongaibuit jong ka Seng Kur Lyngkhoi ba kynthup ïa u Bah Tairan Lyngkhoi bad u Bah Khranglin Lyngkhoi ki la ai ïa ka sneng ka kraw ïa la ki para kur ba kin ri ïa ka akor ka burom bad ba kin bat ïa ka thymmei jong ka Kur khamtam ban pynneh ïa ka riti ka dustur.
Ki la kyntu ïa ki parakur ban kiar na ka shongkha khleh, ban ïatylli bad ban ïa long kawei para kur.
Shwa ban pynkut ïa ka jingïalang la pynbna paidbah ba ka dorbah kaba lai kan sa long ha u snem 2027 ha ka shnong Mairang, Eastern West Khasi Hills District.
Kane ka long katkum u kyrwoh khubor ba la pyllait da u Publicity Secretary ka Seng Kur Lyngkhoi Seng Kmie u Bah J.J. Lyngkhoi.
