Shillong, K’lyngkot, 15: U MLA jong ka North Shillong Constituency u Bah Adelbert Nongrum u la pynpaw ka jingsngewnguh ïa ka Meghalaya Public Service Commission (MPSC) kaba la shim ïa ka jingai jingmut ban pynkyriah ïa ka tarik kaba ïa tyngkhuh bad ka sngi thoh eksamin Staff Selection bad ka eksamin na ka bynta ka post Junior Divisional Accountant hapoh ka Administrative Control jong ka Director of Accounts and Treasuries ka ban long ha ka 24 tarik, Rymphang, 2025.
“Nga ngeit bad nga kyrmen ba ha ki sngi ki ban sa wan ka MPSC ka dei ban da phikir bad husiar ban ym pynduh kabu ïa ki khun samla bad kane kan long kum ka nuksa ban ïaroh ïa ka badei bad ban kynthoh ïa ka bym dei khnang ba ka rukom synshar paidbah kan long kaba khlaiñ bad kaba janai.,” ong u Bah Nongrum ha u kyrwoh.
“Haoid, ki dei tang ki jingjia kiba rit hynrei kin kylla long ki jingjia kiba khraw bad nga kynmaw ha u snem baladep ba nga la dawa ïa ka jingpynbeit na u Dr. Vijay Kumar halor ka jingpynbna (Notification) ba la ithuh tang ïa ki samla pule ba la pas na ka ICAR ban aplai ïa ki kam da kaba pynduh jingithuh ïa kiwei pat kiba pas na kiwei ki ICAR jong kiwei ki jylla ha kaba tang hapoh saw kynta la pynmih noh ïa ka jingpynbna kaba thymmai,” la pynkynmaw u Bah Nongrum.
