Shillong, K’lyngkot, 18: Ka Hill State Peoples Democratic Party (HSPDP) ka la rai ban sei bujli da u Bah Torist Syiem ban pynïakhun ïa ka elekshon MDC na Mawkynrew Constituency ka ban sa long ha ka 21 tarik Rymphang, 2025 hadien ba u MDC ba mynta u Bah Martle N. Mukhim ula rai ban shongthait noh.
Ka jingshongthait noh jong u Bah Martle ka dei na ka daw ka jingban ka jingshitom ha ka bormet.
Ha ka jingïalang kaba la long ha ka sngi Thohdieng la ïadon lang u General Secretary jong ka party u Bah Panbor Ryntathiang uba la pynskhem ïa ka kyrteng jong u Bah Torist Syiem kum u kyrtong jong ka party ha ryngkat ka jingïadonlang jong ki nongkitkam jong ka HSPDP Mawkynrew .
U Bah Torist Syiem u dei u khun jong u Bah Medistar Warbah uba la long u MLA barim jong ka Mawkynrew Constituency bad uba la long ruh u Myntri jong ka sorkar jylla ha ki snem kiba la leit noh.
U Bah Torist haba kren ha ka jingïalang, ula ong, “nga shim ïa kane ka kam da ka jingkitkhlieh ban shakri hok ïa ka Mawkynrew Constituency baroh kawei bad ngan ïai buddien ïa ki matti jong i Bah Martle Mukhim. Kumba phi la ibit, nga kitbok kitrwiang ïa i Bah Martle ba in ïoh noh ïa ka met kaba koit ba khlaiñ.”
“Ha ka elekshon MLA, nga kitbok ïa i Bah Martle ba in khlaiñ noh, kan dei ka jong i,” u la ong.
U la pynkynmaw ruh ïa u Kpa lajong u Bah Medistar Warbah uba la long u MLA bad u Myntri Sorkar naduh u snem 1983 haduh 1988 uba la leh bun ki kam ïa ka Mawkynrew Constituency.
“Nga shim ba kane ka kam ka dei kaba kyntang, namarba ka Mawkynrew Constituency ka long kaba ïar. Ngan shim ba ka dei ka kam mishon ha ka jingim jong nga,” u la ong shuh shuh.
U Bah Panbor haba pynshai halor ka jingsei bujli ïa u Bah Torist Syiem u la ong, “ngi la kham slem khyndiat ban pynbna ïa u kyrtong namarba ngi ïai ap ïa ka rai jong i Bah Martle namarba ngi niew burom ïa u kum u riew rangbah bad ïa ki nongkyrshan jong ka Mawkynrew Constituency.”
“Namar ka jingbym shah shuh ka met, u doktor u la bthah ban shong thait shwa shipor. Ngi sngewkmen shikatdei eh hapdeng ka jingïaid lynti pynban i Bah Torist Syiem i la ïaid shakhmat ban shimti ïa ka jaka jong i Bah Martle ban trei na ka bynta ka bha ka miat jong ka Mawkynrew Constituency,” la ong shuh shuh u Bah Panbor.
