Shillong, K’ Lyngkot 21: Ka Bharatiya Janata Party (BJP) ha ka sngi Baar ka la pynbna ïa ka thup kyrteng banyngkong jong ki 17 ngut ki kyrtong ha ka elekshon Autonomous District Councils (ADC), ka ban long ha ka 21 tarik, Rymphang 2025.
Ki 14 ngut ki kyrtong ki dei kiba hap hapoh ka Khasi Hills Autonomous District Council (KHADC) bad 3 ngut ki dei na Jaiñtia Hills Autonomous District Council (JHADC).
Haba kren sha ki lad pathai khubor u State General Secretary ka BJP u Bah Wankitbok Pohshna u la ong, “kane kan dei ka sien kaba nyngkong ba ka party ka la ïoh ban pynmih ïa ka thup jong ki kyrtong ki ban ïakhun ha kane ka elekshon sha ADC. Nga kyrmen ba da kane ka jingïashim bynta ngan lah ban pynkhlaiñ ïa ka party bad kan ïarap ruh ban noh synniang ha kaba ïadei bad ka jingdonkam ban pynkhlaiñ ïa ka nongrim jong ki district council khnang ba ngin lah ban jied ïa ki briew kiba dei hok ban long ki kyrtong.”
U la ong ba ka thup kaba ar ha kaba ïadei bad ki kyrteng jong ki kyrtong kan long hapoh ka 27 tarik mynta u bnai.
Ha kaba ïadei bad ka jingpyndonkam bakla ïa ka pisa da ki kyrtong ha kine ki elekshon ba la leit na ka liang jong u General Secretary u la ong, “ngam lah ban kynthoh ïa kaei kaba la ïaid bakla ha ki elekshon ba la dep hynrei nga kyrmen ba ki kyrtong ba la pynmih ha kane ka sngi kin leit ban ïalap ïa ka khubor kaba bha.”
Ha kaba ïadei bad ka Manifesto jong ka party u Bah Pohshna u la ong, “ngi dang ap ïa ka party bad shen yn sa lah ban pynlait ha kine ki sngi ban wan bad ngi kyrmen ba ki kyrtong kin lah ban rah ïa ka thong jong u Myntri Rangbah ka ri ha kaba ïadei bad ka jingkyntiew ban ïa ka ri bad kumjuh ruh ha kaba ïadei bad ki ADC.”
Ki 14 ngut ki kyrtong na ka KHADC ki kynthup ïa u Bah Himanta Timung-Jirang, Manin Raja-Nongpoh, Hopingstone Marsharing-Mawhati, Brighstarfield Khongwir-Umsning, Councellor Mukhim-Mawkynrew, Elvisstar Kharbudon-Langkyrdem Laitkroh, Ebren Khongthah-Nongshken, Fairlock D Ryngksai-Nongthymmai, Kynsaibor Lyngdoh Malki Laitumkhrah, Daniella Nonglait- Mawlai, Lewis Janong Sooting-Langrin, Dimandar Lyngdoh-Nongstoiñ, Dominic Wahlang- Rambrai Jyrngam bad Roland Mawsor- Mawshynrut.
Na ka JHADC, ki kyrtong ki kynthup ïa Heimonmitre Phawa- Jowai South, Manbha Lyngdoh- Muthlong Sohkympor, bad Shanbor Rymbai- Musniang Rangad.
