Shillong, K’lyngkot, 28: Ka Federation of Khasi Jaintia and Garo People (FKJGP) ha ka sngi Baar ka la dawa ïa ki bor pynïaid jong ka National Institute of Fashion Technology (NIFT) ban pyndam mardor ïa ka Tender ba la pynmih ha ka 15 tarik Kyllalyngkot, kaba plie lad ïa ki Security Agency kiba nabar ka jylla.
Ha ka jingïakren bad ki lad pathai khubor hadien ka jingïakynduh ïa u Joint Director ka NIFT u Bah Febby D. Shanpru, Vice President ka FKJGP u samla Kitboklang Nongphlang u la ong, “ngi la ïakren bad u Joint Director ba ka NIFT ka dei ban weng noh mardor ïa ka Tender tad haduh ban da shna da kiwei pat ki kyndon ba thymmai kiba ïahap na ka bynta ka jingmyntoi jong ki Security Agency kiba la pynïaid da ki trai ri trai muluk.”
“U Joint Director u la pyntip ba un sa pynsngew ïa kane ka jingdawa jong ka seng sha u Director jong ka NIFT shwa ban shim ïa ka rai,” la pyntip u Vice President ka FKJGP.
U la kynnoh ba ka Tender ba la pynmih da ka NIFT, Shillong katkum ki kyndon ha ka Bid Evaluation Sheet Annexure-ll ka pynpaw shai ïa ka jingplie lad ïa ki Security Agengy kiba nabar jylla Meghalaya bad kiba long pyrshah ïa ki Agencies/Firm kiba don ha kane ka jylla ba la pynïaid da ki trai muluk.
U samla Kiboklang u la ong shuh shuh ba katkum ki kyndon ha ka Bid Evaluation Sheet Annexure-l| Sl.No 1 para 3 ka kdew ba ka Annual Turnover ha ki lai snem ba ladep ka dei ban long 100 klur shaneng bad katkum ka Sl.No. 2 para 1 ka kdew shai tang ïa kiba 100 klur shaneng haduh 300 klur ka Average Turnover ha ki lai snem. Ha ka Sl. No. 3 para 1 ka kdew pat ba haduh 2000 hajar ngut ki Security Personnel dei ban siew.
“Kine ki kyndon ba la buh ha ka Tender ka pynpaw shai ba ka NIFT ka plie lad ïa ki Company/Agency/Firm kiba nabar ka jylla Meghalaya namar ka Institute kaba heh tang 20 akar ka donkam tang haduh 100-150 ngut ki nongap pahara hynrei da kaba buh kyndon ba donkam ïa ki nongap pahara haduh ar hajar ngut ka long kaei kaei kaba kum ka seng kam lah ban pdiang,” u la bynrap.
U la maham ruh ba lada ki bor pynïaid jong ka NIFT kim sngap ïa ka jingdawa ka seng kam banse ban shim da kiwei pat ki sienjam.
