Shillong, K’lyngkot, 28: Hapdeng ki jingïakhun jong ka Sorkar Jylla ban pynkylluid ïa ki lynti ïaid kjat ha ka thain Khyndai Lad, ha ka thain Laitumkhrah bad ha shilynter ka surok GS Road naduh Lad Umsohsun ter ter shaduh Motphran la sakhi ba ha ka 27 tarik, Kyllalyngkot, 2025 ka jingbym don jong ki nongdie madan ha kine ki lai tylli ki jaka ka la wanrah ïa ka jingkylluid hi war ïa ka leit ka wan bad ka ïaid ka ieng jong ki paidbah.
Ka kynhun lum khubor jong ka Batesi TV kaba la poi ïaid lynti ha kine ki lai tylli ki jaka ka la shem ba ka jingkylluid jong ka surok bad ki lynti ïaid kjat ka dei na ka daw ba ki nongdie madan kim shym la shong die jingdie ha kane ka sngi namarba ki la leit sngewlem ïa ka iing ka sem jong ka Kong Angela Rngad kaba la duh noh ïa la u jong u kurim u Tarun Bhartia ha kaba kine ki arngut shikurim ki dei kiba ju don lang ha syndah jong ki nongdie madan na ka por sha ka por ban ïakhun na ka bynta ki jingeh bad ki hok ki jong ki.
Lai ngut na ki nongïaid lynti kiba ïakren bad ka kynhun lum khubor ki la pynpaw ba ki da sngew kylluid haduh katta katta ha ka leit ka wan bad ka rah ka rong namarba ka lynti ka syngkien kam shym la khapngiah satia ha kane ka sngi.
Kum ban shu pyntip hangne ba u Chief Executive Officer (CEO) ka Shillong Municipal Board (SMB) u la phah da ka jingpyntip sha ka seng ki nongdie madan kiba don hapoh ka shatri jong ka Meghalaya Greater Shillong Progressive Hawkers and Street Vendors’ Association (MGSPHSVA) ba ka jingïalang jong ka Provision Town Vending Committee kan long ha ka 5 tarik, Rymphang ban ïasyllok ha kaba ïadei bad ka jingpynkynriah ïa ki nongdie madan sha ki jaka ba ladep pynkhreh hadien ka jingtur paidbah sha ophis ka Municipal dang shen.
