Shillong, Rymphang, 03: Ka jingpynkut noh noh ia ka 1st Puriang football league 2024-2025 ba la pynlong da ka Puriang Socio-cultural and Sports Club ka la long kaba shongshit ha kaba u Bah Tenjen Nongrum uba long u khun jong u MLA barim ba la khadnoh jong ka Mawryngkneng Constituency Bah David Nongrum u la long kum u kongsan, ryngkat ka jingsakhi lang jong u Bah Kris Kharsati, u Sordar Shnong Bah Lotipson Mynsong, u Chief Adviser jong ka Club u Bah Jackson Kharsunai uba long ruh u Secretary Shnong, u President ka Club u Bah Micky Suting, u General Secretary ka Club u Bah Marconi bad kiwei kiwei.
Ha kane ka lympung ialehkai kaba la long ha ka 1 tarik, Rymphang 2025 ha ka kyrdan Under-14 ka kynhun ialehkai jong ka Sawkyntoit ka la pynliem noh ia ka Iewrim da 2 kol la nod bad ia ka nam Best Player la ioh da u Habamut Khriam, Best Goal Keeper la ioh da u Lambha Kharluhi bad Best Scorer la ioh da u Wanteilang Mukhim. Katba ha ka kyrdan Senior ka Mawkajut ka la iohrah ia ka nam lahduh da kaba pynliem noh ia ka Kruin da 3 kol la nod lyngba ka jingiashut penalty bad ia ka nam Best Player la ioh da u Lasanki Nongspung, ia ka nam Best Goalkeeper la ioh da u Don Kharsati bad ia ka nam Best Scorer la ioh rah da u Hamebanjop Suting.
Ha kane ka sngi, ka Dorbar Shnong ka la pynkup burom ruh ia ki 13 ngut ki khynnah kiba la pas bha ha ki eksamin bapher bapher ki jong ki.
