Shillong, Rymphang, 06: Ki nongrep synsar kiba ju im kamai jakpoh da kaba rep synsar na ka thain Mynriang, ka shnong kaba hap hapoh ka East Khasi Hills District ha ka sngi Palei ki la leit ban pan jingïarap na ka Deputy Commissioner ka East Khasi Hills District ka Kong RM Kurbah ba kan ïakren bad ki bor Sorkar ha kaba ïadei bad ka dor jong u synsar.
Ki nongrep synsar ha ka jingïakren bad ka Batesi TV ki la pynpaw hakhmat ka Deputy Commissioner ïa ka jingeh ba ki ïakynduh namar ka jingbym biang ka iew ka hat bad ka jing shah khniot dor shaba palat ka la wanrah ïa ka jingduh nong bakhraw jong ki nongrep synsar.
“Namar ngi ki nongrep Synsar kiba don hapoh ka Jylla ngi la ïakynduh jingeh bha namar ka jingbym biang ka ïew ka hat bad ka jingshah khñiot dor shaba palat ka la wanrah ïa ngi ka jingduhnong bakhraw. Ngi shu pynkynmaw ïa phi ba ha u snem 2021-2022 ngi ki nongrep Synsar ngi dang lah ban die haduh 120 tyngka haduh 130 tyngka. Hynrei ha kine ar snem ba la leit kata 2023-2024 ngi la shah shim kabu bad shah khñiot dor kynsan kynsan ha kaba ngi die tang 20 tyngka haduh 50 tyngka ryngkat ka jingshah kyntait ïa ki mar. Katba mynta u Snem 2025 ka dor Synsar ka long tang 47 tyngka bad 48 tyngka. Te tang kane ka dor ngim pat sngew im kum ki Nongrep tang ka bai trei ruh ngim pat lait,” ong ki nongrep synsar.
Kumta halor kane ka mat na ka liang jong ki, ki la pynpaw ba ki la sngewduh jingkyrmen bha haba ïadei bad ka dor Synsar mynta u snem ruh. “Kumta ngi kyrpad ïa phi ba phin sngewbha ban ïarap lem ïa ngi ki nongrep Synsar ban pynsngew ha ki bor ba halor ïa kane ka jingeh jong ngi kaba la ktah ïa ka ïoh ka kot jong ngi khamtam ba ngin pyndap ïa ka ïing ka sem. Kumba ngi ju ong ba ki Nongrep ki dei ki budlum jong ka Jylla bad ka ïoh ka kot ka shong ha ka jinglah ka ïew ka hat jong ki Nongrep. Ngi ngeit skhem ba phin shah shkor ïa kane ka jingkyrpad jong ki nongrep Synsar,” ong u Bah Rikan Kharsati, nongrep synsar na Mynriang.
