Shillong, Rymphang, 06: Ka National Career Service Centre for Differently Abled (NCSC-DA), kaba hap hapoh ka Directorate General of Employment (DGE), Ministry of Labour & Employment, ka Sorkar India ka la pynlong ïa ka Exclusive Job Fair na ka bynta ki briew kiba don jingduna ha ki dkhot met ha ka sngi Palei.
Ïa kane ka sienjam la pynlong da ka jingïatreilang bad ka American India Foundation, kaba thmu ban kyntiew ïa ka jingpynkup bor ha ka ïoh ka kot ïa ki briew kiba don jingduna ha ki dkhotmet sha ki shlem treikam.
Ki don haduh 79 ngut ki briew ba don jingduna ha ki kjat, kiba don jingduna ha ka bor kren bad bor ïohsngew, ka jingduna ha ka bor ïohi, kiba la kiba la ïashim bynta ha kane ka sngi.
Ki hynriew tylli ki shlem aikam kiba kynthup ïa ka Reliance Retail, Domino’s Pizza, Compass Group, Teleperformance, Employment Express, bad Anamata Outsourcing Pvt Ltd ki la tyrwa ïa ki kam kum ha ka Delivery Associate, HR Recruiter, Customer Support, bad Multiple Role. Na kine ki 79 kiba la poi sha kane ka sngi, 41 ki la shah jied ban trei ha kine ki shlem treikam.
Ha kane ka sngi, la sakhi lang da u Director ka Directorate of Employment ka Sorkar Jylla u J.P. Lakiang uba la long kum u kongsan, u Director jong ka Composite Regional Centre (CRC), Shillong u Ram Shakal Sahani kum u symbud kongsan, u Project Lead ka MSRLMS, ka Sorkar Meghalaya u Jaydip Mukherjee, u ADE & SREO, NCSC-DA u Sujit Kumar Sahoo, ka Project Lead Manager jong ka American India Foundation ka Revati Vishwanathan bad kiwei kiwei.
