Shillong, Rymphang, 28: Ka Hynñiewtrep Border Dispute Redressal Forum (HBDRF) bad ka Kong Banikas Laban ha ka sngi Thohdieng ki la leit ba aiti da ka dorkhas ha u Deputy Commissioner jong ka West Jaiñtia Hills District u AK Singh da ka jingkyrpad ba un ïakren lem bad ki bor synshar jong ka West Karbi Anglong District na ka bynta ban weng noh ïa ka ejahar ba la mudui da ki paid Karbi ha Jrikyndeng Police Station pyrshah ïa ka Kong Banikas Laban kaba la ïakhun kum ka kyrtong jong ka Seng Congress ha ka elekshon sha ka Jaiñtia Hills Autonomous District Council (JHADC) kaba dang shu dep long shen.
U Chairman jong ka Forum u Bah Chandame Sungoh ha u kyrwoh ba la phah sha ki lad pathai khubor u la ong ba ym lah lah ban tip mano ba soi bad mynno la ujor ïa kane ka ejahar hynrei la shu ïoh jingtip lyngba ki lad pathai khubor na Karbi Anglong halor kane ka kam bad la ïoh jingtip ruh lyngba ka phone call na u Officer Incharge jong ka Jrikyndeng Police Station uba la ïoh pdiang ïa kane ka ejahar pyrshah ïa ka Kong Banikas Laban.
Haba ka Kong Laban ka la pyrshang kylli bniah halor ka ejahar ba la mudui pyrshah ïa ka, hynrei, u Officer Incharge jong ka Jri Kyndeng Police Station u la pynlip noh ïa ka mobile bad wat haba ka la pyrshang ban telephone biang ruh um shym la shim shuh ïa ka mobile phone.
U Bah Sungoh u la ong ba ki paid Karbi ki la kam trai ïa ka shnong Mowluber bad kam ruh ba ka dei kaba dang hap hapoh ka West Karbi Anglong, Assam bad ba ka Kong Banikas Laban ka dang dei ka nongshong shnong jong ka Karbi Anglong, Assam hynrei kumno ka ïa khun Election MDC na 12-Barato Mukroh Constituency jong ka Jaiñtia Hills Autonomous District Council (JHADC).
Katkum ka jingong jong u Bah Sungoh, ka shnong Mowluber ka dei kaba dang hap hapoh ka West Jaiñtia Hills District jong ka Jylla Meghalaya bad ka Kong Banikas Laban ka dei ka nongshong shnong ba pura jong ka jylla Meghalaya bad ka la pynshisha ïa kane lyngba ki kot ki sla jong ka.
Ka Forum ka la dawa ruh ïa ki briew kiba donkti ban mudui ïa ka ejahar ba ki dei ban leit weng noh hapoh san sngi hynrei lym kumta ka Forum kam banse ban shim da kawei pat sienjam kaba kham tyngeh.
Ka Forum ka kyntu ïa u Deputy Commissioner jong ka West Jaiñtia ba un shimkhia mardor halor kane ka kam khnang ba kan ym ktah ïa ka Kong Banikas ha ka leit ka wan bad ka shong ka sah jong ka.
“Ki Karbi ki dei ban burom ïa ki Khasi-Pnar kiba dei ki trai shnong bad kim dei ban thaw jingklumar eiei bad ruh ki dei ban pynneh ïa ka shongsuk shongsaiñ bad lada mih kano kano ka huri hura na kane ka daw kito kiba ujor ïa kane ejahar ki dei ban shim ïa ka jingkit khlieh,” ong u Chairman jong ka HBDRF.
