Shillong, Lber, 03: Ka Iingbishar Gauhati High Court ka la ai jamin ïa u Chancellor jong ka University of Science and Technology Meghalaya u Mahbubul Hoque, hadien ba u la shah kem ha ki Pulit ka Jylla ha kaba ïadei bad ka Case 54/2025 ba la rejistar ha Patharkandi, Sribhumi. Hynrei ïa ka case 55/2025 kaba ar la buh sngi ban shong bishar ha ka 4 tarik, Lber, 2025.
Ka Iingbishar ka la shong bishar ha ka sngi Thohdieng ka 28 tarik Rymphang, 2025 halor ka jingpan jamin da u Hoque bad ïa ka rai ka la pynmih ha ka 3 tarik, Lber, 2025 la pyntip ka lad pathai khubor India Today NE.
U Hoque u la shah kem ha ka 21 tarik, Rymphang, 2025 ha ki Pulit jong ka Sribhumi bad la ïalam ïa u sha Dispur Police Station na ka bynta ban pynlong ïa ka jingtohkit shwa ban tian bishar hakhmat ka Kashari ha Sribhumi District ha ka 24 tarik, Rymphang, 2205 hadien ba ladep ban leh ïa ka medical examination ha Karimganj Civil Hospital.
Ha ka 25 tarik, Rymphang, 2025 ka Kashari ka la hukum ïa u Hoque bad ïa ki san ngut kiwei pat kiba la shah kynnoh donkti kiba kynthup ïa u Hiramani Saikia, u Bijoy Dutta, u Rezzak Ali, u Numaan Ahmed bad ïa u Imdadur Rahman ban set ha Thanat Pulit na ka bynta saw sngi.
Kum ban shu pynkynmaw hangne, ba u Chancellor ka USTM u Mahbubul Hoque ula shah kem ha ka 21 tarik u Rymphang ha ki pulit Assam bad ka Special Task Force ha kaba ïadei bad ka Case kaba la rejistar ha Sribhumi, Assam hadien ba ka la mih ka jingkynnoh ba ka la don ka jingleh thok ïa ka eksamin ha ka skul kaba la pynïaid da ka ERD Foundation ha kaba u Hoque ula long kum u Chairman.
