Shillong, Lber, 03: Ki dkhot jong ka Federation of Khasi Jaiñtia and Garo Peoples, South West Khasi Hills District ha ka Lah Sngi u Blei ba la lamkhmat da u President u Bah Kenes Sohshang ki la hiar sha ka shnong Awro, ka shnong kaba dang hap hapoh ka South West Khasi Hills District ban noh synniang da ki tiar shet bad ki nep syiad ïa kawei ka longiing kaba la ngat ha ka apot pluh iing.
Kum ban shu pynkynmaw hangne ba ka iing jong u Bah Batskhem Ramsiej bad ka Kong Slinda Thongni kiba don lai ngut ki khun, ka la kylla dpei hadien ba ki thylliej ding barhem ki la bamduh ïa ka ing baroh kawei ha ka 19 tarik, Rymphang, 2025 ha ka por 12 baje eiei.
Katkum ka khubor ba la ïohlum la ong ba ka iing ka la kem ding ha ka por ba ka Kong Slinda ka dang leit saitjaiñ sha wah katba u Bah Batshkem u dang don ha ka jaka rep synsar bad ha kane ka jingjia kam shym la don kano kano ka jingjia ba sngewsih namarba ki khun kim shym la don satïa hapoh iing.
Ha ka jingïakren bad ki lad pathai khubor, ka kong Slinda ka la ïathuh ba ka jingkem ding jong ka iing ka lah ban dei lehse ba ka la klet ban pynlip ïa ki tyllaw ding ha dpei shwa ba kan mih ban leit sait ïa ki jaiñ sha wah.
Ka FKJGP ka la kyrpad ïa ki nongmihkhmat jong ka thaiñ ban phaikhmat lem sha kane ka longiing kaba la ngat ha kane ka apot bad kumjuh ruh ïa ki seng trei monsngewbha ba kin noh synniang lem sha kane ka longiing kaba don mynta ha ka khim khait.
