Shillong, Lber, 05: Ka Sorkar Jylla ka dang ap ïa ka jingmynjur jong ka All India Council for Technical Education (AICTE) ban pynsdang noh ïa ka jingpynlong klas ha College of Architecture and Urban Planning, Tura, West Garo Hills District.
“Wat hapdeng ki jingeh, la lah ban shna pyndep ïa ka building bad mynta ngi dang ap ban ïoh sa ïa ka jingmynjur na ka AICTE (ban sdang noh ïa ka Academic Session jong ka College),” la pyntip u Myntri ka tnat Pule Puthi ka Sorkar Jylla Education u Rakkam A Sangma haba jubab ïa ka jingkylli ha Ingdorbar Thawaiñ.
U la pyntip ba ka Sorkar kan sa aplai ban ïoh jingbit ha u bnai Nohprah mynta u snem namarba ïa ka website na ka bynta kane ka jingthmu la plie dang ha kane ka kynti ba mynta.
U Myntri u la pyntip ba ka pisa kaba ka la mang da ka Sorkar India na ka bynta kane ka projek ka long T. 26 klur bad lyngba ka Funding Pattern kaba 90:10 Ratio ka Sorkar India haduh mynta ka dang shu dep pyllait ïa ka pisa kaba kot T. 23.4 klur.
