Shillong, Ïaïong 01: U samla Kevin Lyngdoh Sangriang uba la 15 snem ka rta na ka thain Mawkyrwat u la ïoh khur ïa ka takma Ksiar ha ka lympung ïalehkai ñiah saikil kaba la tip kum ka 21st National Mountain Bike Championship 2025 kaba long ha Morni Hills jong ka jylla Haryana kaba la sdang naduh ka 28 tarik bad kaba la kut noh ha ka 31 tarik, Lber 2025.
U samla Kevin u la ïoh khur ïa ki ar tylli ki takma ksiar ha ka jingïakop Cross Country Time Trial bad ha ka Cross Country Olympic. Katba u samla Meban Aiboklang Suïam u la ïoh khur ïa ka takma Rupa.
Ha kane ka lympung ïakob ñiah saikil ka Meghalaya Cyling Association ka la phah 14 ngut ki samla shynrang bad kynthei ban leit ïashim bynta hynrei napdeng kine ki 14 ngut dei tang kine ki arngut kiba la ïoh khur takma katba ki 12 ngut kiwei pat kim shym la ïoh takma satia hynrei ki la lah ban pynpaw pat ïa ka sap ka phong bad ïa ka jingtbit ban ñiah cycle jong ki.
Ïa kine ki 14 ngut kynthup ïa ki nongjop takma la pdiang burom ha ka 1 tarik, Ïaiong 2025 da ka Meghalaya Cycling Association ha ISBT Mawiongrim, Shillong ba la lamkhmat da u President u Bah Lening S. Bareh ha ryngkat ka jingdonlang jong ki nongkitkam.
