Shillong, ïaïong, 01: U Myntri ka Sorkar Jylla Bah Paul Lyngdoh uba long ruh u nongaiktien ka Sorkar Jylla ha ka sngi Thohdieng u la ong ba ka donkam ïa ka Sorkar Jylla kan jubab ïa ki jingkylli ba la buh da ka Sorkar Pdeng bad ban pyni ruh ïa ka jinglah ban pyntreikam ïa ka Inner Line Permit (ILP).
Ha ka jingïakren bad ki lad pathai khubor, u Bah Paul u la ong ba u Myntri Rangbah ka Jylla u Conrad K Sangma u la ïakynduh dang shen ïa u Myntri ka tnat Kam Pohiing ka ri u Amit Shah halor kane ka mat.
“Kam dei ba ka Sorkar Pdeng ka pyrshah ïa ka jingmut jong ka ILP hynrei ki la buh katto katne ki jingkylli bad kine ki jingkylli ki long kiba kongsan ïa ngi ban pynbeit bad ban pynhun ïa ka Sorkar Pdeng ba ngi don ha ka kyrdan ban pyntreikam shisha ïa ka ILP shisien ba ka Sorkar Pdeng ka la mynjur ïa ka,” u la ong.
“Kum ka nuksa, ka la long ka mat jong ka Meghalaya kaba long ka lynti ïaid ïa kaba la pynpaw ha kiba bun ki jingïalang bad kumba phi tip, ngi dei ruh ka khyrdop sha ki jylla ba kynthup ïa ka Mizoram bad Tripura lait noh na ki district hapoh ka Assam. Kumta ka jingeh ka long kumno phin pynsuk ïa ka rukom treikam kum ka ILP kaba pynlong ïa ka Meghalaya ban long ka jaka ïaid lynti ha kaba ka Tnat Kam Pohing ka sngew ba ngi la don lypa ïa ka Sixth Schedule bad ka Land Tranfers Act bad ki Autonomous District Council, kiba long ki aiñ ba la pynkupbor da ka riti synshar ka ri da shibun ki aiñ. Kumta kine ki long ki jingeh bad kam dei ka jingkut jong ka lynti na ka bynta ki jylla jong ngi hynrei ki jingïakren ki dang ïaid shakhmat bad ngin dang ïai bteng ban jubab ïa ki jingkylli kiba ai jinghun ïa ka Sorkar Pdeng,” la bynrap u Bah Paul.
Ha kajuh ka por, u Myntri u la ïaroh ïa ka Sorkar Pdeng kaba la shim rai ban mynjur ïa ka Immigration and Foreigners Bill, 2025 kaba pyrkhing ïa ka jingwan rung kyrthep ki mynder, ka jingrung jingmih bad ka shong ka sah ki mynder ri hapoh ka ri India.
Da kaba pynpaw ba kane ka dei ka sienkam kaba paka tam, u Bah Paul u la ong, “ngi pdiang sngewbha ïa kane ka aiñ ha Meghalaya kaba ïasam ïa u pud u sam ba jrong bha uba dei ruh u pud u sam uba khlem pat don jingker bad ngi don ruh markhap bad ka jylla Assam kaba jur bha ka jingrung tuh jong ki mynder ri.”
“Kan sa wanrah jingkylla bad kan khanglad ïa ki jingrung kyrthep ki mynder ri sha ka thaiñ Shatei Lammihngi bad da kaba bishar ïa ka jinglong jingman ba mynta ha ka ri Bangladesh, ngi donkam ïa ki sienjam kiba pynthikna ba ka jingroi briew ha ka jylla kam dei ban shah ktah na ka jingkharoi jong ki mynder ri,” u la bynrap shuh shuh.
