Shillong, ïaïong, 08: Ki nongïalam jong ka Khun Hynñiewtrep National Awakening Movement (KHNAM) Central Executive Committee ba la lamkhmat da u Working President u Bah Thomas Passah ha ka sngi Baar ki la pynsngew biang sha ka Executive Committee bathymmai jong ka Khasi Hills Autonomous District Council (KHADC) ïa ki lai tylli ki mat kiba ym shym la lah ban pynurlong da ka Executive Committee kaba rim ba ïalam da ka National Peoples Party (NPP).
Ki nongïalam jong ka party ki la aiti ruh ïa ka dorkhas ha u Chief Executive Member (CEM) ka Khasi Hills Autonomous District Council (KHADC) Bah Shemborlang Rynjah ban kyrpad ïa ka District Council ba kan pynkylla noh ïa ka AD Rule 128 jong ka Assam and Meghalaya Autonomous District Constitution of District Council Rules, 1951 kaba plie lad lyngba ka para kaba 128 (1) sub para (d) bad kaba 128 (3) ïa kiwei pat ki jaitbynriew ki bym dei ki Khasi ban thep vote ha ki election District Council.
Ka mat kaba ar ba ka seng ka la pynsngew ka long halor ka jingtreikam jong ki Rangbah Shnong khlem ka jingpynskhem da ka Hima Mylliem ha ki shnong kiba hap hapoh ka them Raid Marwet kiba kynthup ha ka shnongMaikholi, Pillangkatta-A, Iongkhuli, Mawiong, Gambalban, Jyrmang, Jolsyiem, Rangsakona, Chibra, Nongspung-A, Nongspung C bad kiwei kiwei ha kaba ki jaitbynnew Garo ki treikam kum ki Rangbah Shnong bad ki pyndonkam ruh ïa ka Letter Head bad ka muhor jong ka Dorbar Shnong kaba long pyrshah ïa ka “The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act 2007”
Ka mat kaba lai ba ka KHNAM ka la pynsngew ka long ba ka District Council kan pyrkhing noh ïa ka jingai trading license sha ki bym dei ki trai jylla lyngba ka Trading by Non-Tribal Regulation 1954 khamtam ha ki kam ki jam bad ka khaïi ka pateng kaba ki trai ri trai muluk ki la lah ban trei hi dalade.
