Shillong, ïaïong, 10: Ki nongïalam jong ka Meghalaya Schools Welfare Development Association (MSWDA) ha ka sngi Palei ki la ïakynduh ïa u Myntri ka tnat Pule Puthi ka Sorkar Jylla u Rakkam A. Sangma ban ïakren ha kaba ïadei bad ka jingtyrwa jong ka seng ïa ka Sorkar ban ithuh noh ïa ki skul ba la pynïaid da ki riewshimet kum ki Non-Government School khnang ban pynbeit ryntih ïa ka jingbuh kyrdan da ka Sorkar ïa ki skul bapher bapher kiba don hapoh ka jylla.
Ha ka jingïakren bad ki lad pathai khubor u President jong ka MSWDA u Bah Hamarbamut Marbaniang u la ïathuh ba ka jingïakren bad u Myntri ka long ban ïoh jingpynshai halor ka jingpan jong ka Sorkar na ki nongpynïaid ban shimti noh ïa ki skul SSA.
“Ka la don ka jingthoh kaba phah lyngba ki SDSEO sha ki skul na ka bynta kito kiba don ka mon ban aiti ïa ki skul jong ki sha ka tnat Pule Puthi lyngba ka No Objection Certificate (NoC) kaba ki hap ban soi,” la ïathuh u Bah Marbaniang bad bynrap, “halor kane u Myntri ruh u la ong ba kane ka dei na ka bynta ka rekod kaba pynkhreh lypa ïoh hadien habud ba ka Sorkar Pdeng kan pynduh noh ïa ka skhim SSA khnang ba kan pynsuk ïa ka Sorkar ba kan leh ïa kaba donkam.”
“Halor kane ka mat, ma ngi kum ki nongpynïaid ïa ki skul mishon, NGO bad ki riewshimet ngi la banjur halor ka mat ba ngin dup ïoh jingshai namarba na ka bynta kine ki skul pat kin leh kumno,” la ong u President ka MSWDA.
“Katkum ka dorkhas ba la ngi la kyrpad ïa ka sorkar ban pynbeit ryntih, ban ithuh noh ïa ngi kum ki Non-Government School, Aided, Partially Aided na ka liang jong u Myntri ruh u mynjur bad ngi halor kane ka jingkyrpad bad ba ka tnat Pule Puthi jong ka Sorkar mynta ki dang pynkhreh halor kane ka jingpynbeit ryntih bad ban pynduna ïa ki jingbuh kyrdan ïa ki skul,” la ïathuh shuh shuh u Bah Marbaniang.
Ha kaba ïadei bad ka jingkyrshan ïa ki skul ha ka kyrdan Secondary bad ka jingkyntiew kyrdan, u la ong, “u Myntri u la pyntip ba kane ka long kaba donkam namarba ki skul Secondary ki dei ban don haduh ka kyrdan Higher Secondary. Halor kane, ha ka jingïakren ngi la rai ban ïakynduh ïa u Myntri Rangbah ka Jylla.”
“Halor ka jingpynkhlaiñ ïa ki skul naduh ka kyrdan Pre-Primary ngin sa ïakren bha bad u Myntri Rangbah bad na ka bynta kaba ïadei bad ki nonghikai kiba la don ha ka kam ban phah pyntbit namarba kim pat pyndep ïa ka D.El.Ed ne B.Ed, u Myntri u la kubur ba bun na ki nonghikai kim pat pyndep ïa ka D.El.Ed bad B.Ed,” u la ong.
U la ïathuh ba na ka bynta ki nonghikai kiba ïakynduh jingeh na ka result D.El.Ed. u Myntri u la pyntip ba u la shimkhia ïa kane ka mat da kaba phah sha ka NIOS ban ai jingpynshai halor kane.
Na ka bynta ka jingai ryntih ïa ki Uniform skul ba la ai da ka Sorkar tang sha ki skul sorkar bad sha ki skul SSA, u la ïathuh ba u Myntri u la shimkhia ba kan long ryntih lang sha baroh ki skul.
