Shillong, ïaïong, 15: Ki nongïalam jong ka Meghalaya SSA School Association (MSSASA) ba la lamkhmat da u President Bah Aristotle C.Rymbai ryngkat ka jingdonlang jong ki nongïalam ka Meghalaya 4th Teachers Association (M4TA) ha ka sngi Baar ki leit ban ïakynduh ïa u Commissioner and Secretary jong ka tnat Pule Puthi u Vijay Kumar Mantri ban buddien halor ka jingphah jingthoh jong ka tnat Pule Puthi sha ki bor pynïaid jong ki skul halor ka jingbym shai ïa ka jingthmu jong ka Sorkar ban shimti na ka bynta ban pynïaid hi noh da ka Sorkar Jylla.
Ha ka jingïakren bad ki lad pathai khubor, u Bah Rymbai u la ong, “ngi la buddien ïa ki mat kiba ngi ladep ïakren mynshwa ha kaba ïadei bad ka jingshimkhia ka Sorkar ban shimti noh ïa ki skul SSA.”
Dang ha khyndiat sngi, ka tnat Pule Puthi jong ka Sorkar Jylla ka la phah da ka jingthoh sha ki nongpynïaid jong ki skul SSA ba la pynïaid da ki kynhun bapher bapher ba kin ai ïa ka jingmynjur la ki mynjur neem ban aiti ïa ka Managment na ka SSA sha ka tnat Pule Puthi ka Sorkar Jylla.
U la ïathuh ba katba ka Sorkar ka la phah ïa ki shithi ka seng ka la lap ba bun na ki skul Private, Mission, NGO ba la pynïaid ïa ki skul SSA ka la mih ka jingeh. “Ka jingeh kaba mih ka long ba kim shai halor ka jingthmu jong ka Sorkar. Halor kane ngi la ïakren sani bha bad u Commissioner and Secretary jong ka tnat Pule Puthi bad ngi la kyrpad ba ka Sorkar kan pynjlan ïa ka por ba ki Management kin aiti ïa ka jingmynjur jong ki bad ïa kaba u Commissioner and Secretary jong ka tnat Pule Puthi u la kular ban pynjlan haduh kaba kut une u bnai,” la ïathuh u Bah Rymbai.
“Na ka bynta ki bor pynïaid skul kiba ladep ai ïa ka jingmynjur ban aiti ïa ka Management sha ka tnat Pule Puthi, ngi la ong ïa u Commissioner and Secretary jong ka tnat Pule Puthi ban nang pyntyllun shakhmat ïa ka File katba donkam ban leh hapoh ka tnat treikam,” u la ong.
“Na ka bynta kito ki skul SSA kiba la long trai da ki Private, Mission, NGO ne Society ki bym mynjur ban aiti ïa ka Management sha ka Sorkar ngi la ai jingmut ban pyrkhat lem ïa ka jingshahkri kaba ki la ai baroh shikatta ban kyntiew ïa ka pule puthi ha ka jylla da kaba ailad ïa ki nonghikai ha kine ki skul ba kin ïai bteng ïa ka kam ha kine ki skul ha kaba ka Sorkar kan ai ïa kijuh ki jingmyntoi kumba ai ïa ki nonghikai kiba ki Management na ka SSA ki la mynjur ban aiti sha ka Sorkar,” u la bynrap.
“Ngi la ai jingmut ba ka Sorkar kan ailad ïa ki nonghikai jong ki skul SSA kiba ki Management kim treh satia ban aiti sha ka Sorkar da kaba ailad ba kin ïai bteng ïa ka kam tad haduh ba kin da lah dei ka por shongthait,” la pyntip u Bah Rymbai.
“Ngi la ai jingmut ruh ïa ka sorkar ban ñiew ïa kine ki skul SSA bym treh ban aiti sha ka Sorkar kum ki Grant-in-Aid School namarba ki dei ban ïoh ïa ki jingmyntoi na ka bynta ban ïoh ïa ka jingsiew tulop kaba thymmai,” u la ong.
Shuh shuh u la ïathuh ba ka MSSASA ka la ai jingmut ba na ka bynta ki skul SSA ki bym don khynnah bad kiba tang hapoh shiphew ngut dei ka Sorkar ka dei ban pynkynriah noh ïa ki khynnah bad ïa ki nonghikai sha ki skul kiba don hajan kiba kham bun ïa ka jingdon jong ki khynnah.
U la ïathuh ruh ba u Commissioner and Secretary u la pyntip ba un sa khot da ka jingïalang hapdeng ki Ophisar na ka tnat Pule Puthi bad kynthup ruh ïa ki nongïalam jong ki nonghikai SSA bad 4th Teacher.
Ha kaba ïadei bad ka jingpynkhreh ïa ki jingkylli na ka bynta ka Class-VI, VII, VIII da ka MBoSE ne ka DERT, u Bah Rymbai u la ong, “ngi sngewkhia pat ha kaba ïadei bad ka Syllabus namarba haduh mynta kam pat don satia na ka bynta ka Class-VI, VII bad VIII.”
“Dang ha kine ki taiew ba ladep ngi la ïakynduh ïa u Commissioner and Secretary halor kane ha kaba u la pyntip ba ka tnat Pule Puthi ka dang pynkhreh ïa ka Syllabus kaba la jan dep artat,” la pyntip u President ka MSSASA.
