Shillong, Ïaïong 15: Ban pynkhlaiñ ka jingpyntreikam ïa ki skhim ba la bei pisa da ka sorkar pdeng bad ki prokram jong ka tnad Women and Child Development, Sorkar India, ka Myntri Khynnah jong ka Sorkar Pdeng kaba khmih ïa ka tnad Women and Child Development Savitri Thakur ka la pynlong ïa ka jingïalang peit bniah bad ki heh ophisar jong ka tnad Social Welfare jong ka Sorkar Meghalaya.
Ki jingïakren ki long ban bishar bniah ïa ka jingïaid shaphrang ki skhim ba kongsan kum ka Poshan Abhiyan, ka Mission Shakti, bad ka Mission Vatsalya. Ha kane ka jingïalang, ka Myntri ka la ban jur ïa ka jingdonkam ban pynkhlaiñ ïa ki rukom ai jingshakri ha ki jaka treikam, khamtam ha ka jingtreikam jong ki Anganwadi Centre.
Ha kane ka jingïalang la ban jur ïa ki bynta ba kongsan ba kynthup ka jingdonkam ïa ka jingbam kaba tei met man ka por bad kaba bha hapoh ka Integrated Child Development Services (ICDS), ban kyntiew ïa ki jingdon jingem ha ki Anganwadi Centre ban pynthikna ba ki long kiba ïadei bad ki khynnah bad ki longkmie, ban pyndonkam ïa ka teknoloji na ka bynta ban buddien ha ka por bad ban buddien ïa ki nongïoh jingmyntoi, ban pynshlur ïa ka jingïashim bynta ka imlang sahlang, bad ka jingkyntiew ïa ka bor treikam jong ki nongtrei Anganwadi ban ai ka jingshakri kaba kham bha.
Shuh shuh, la pynlong ïa ka jingpeit bniah bad ki bor pynïaid jong ka East Khasi Hills District kum shi bynta ka jingwan jngoh ka Myntri ïa ka thaiñ shatei lammihngi. Ha kane ka jingïalang la don lang u MLA ka thaiñ Bah Ollan Singh Suin bad ki nongmihkhmat na ki tnad treikam bapher bapher, ha kane ka jingïalang la kynthup ïa ki jingpynshai ba bniah halor ka jinglong jingman jong ki skhim pynroi bad ki projek ba ïadei bad ki jingdon jingem ha ka district. Ki jingïakren ki la long halor ka jingpyntreikam ïa ki skhim ba ïadei bad ka jingkyntiew ïa ki longkmie bad ki khynnah, ka koit ka khiah, ka pule puthi, ka roi ka par ha ki jaka nongkyndong, bad ka jingpynmih ïa ki lad kamai kajih, ryngkat bad ka jingbishar bniah ïa ka jingkiew shaphrang ha ki jaka ba jngai bad ki jaka nongkyndong bad ka jingithuh ïa ki jingeh ba kongsan.
Ka Myntri Khynnah ka la ïaroh ïa ki sienjam jong ka sorkar jylla bad ong, “Watla ki don ki jingeh ha ka jingpynïasoh bad ka bording, ki ophisar ki trei da ka jingaiti lut ban pynthikna ka jingpyntreikam bha ïa baroh ki skhim. Nga ai jingïaroh ïa ki sienjam jong ki bad pynshlur ïa ki ban ïai pynthymmai ïa ki jingtip halor ka Poshan Tracker, namar kine ki kaiphod ki ïarap ïa ka Tnad ban pynbiang kham kloi ïa ki jingdonkam.”
Ka la bynrap shuh shuh, “Ngi kut jingmut ban pynurlong ïa ka thong jong u Myntri Rangbah duh Narendra Modi na ka bynta ka Viksit Bharat, bad man ka sienjam ba ngi shim ha ka jingpynkupbor ïa ki kynthei bad ki khynnah ka nang pynjan ïa ngi sha kata ka thong.
Hadien kane, ka Myntri khynnah jong ka sorkar pdeng ka la leit ïakynduh ïa u Lat ka Jylla Meghalaya. Ka jingïalang ka kynthup ïa ki jingïakren halor ki sienjam ba la ïalam da ki jylla ban kyntiew ïa ka bha ka miat jong ki kynthei bad ki khynnah bad ban kyntiew ïa ki jingïarap ba la pynshong nongrim ha ka imlang sahlang na ka bynta ka roi ka par kaba kynthup ïa baroh.
Ka jingwan jngoh ka pyni ïa ka thong jong u Myntri Rangbah duh ban pynkhlaiñ ïa ka thaiñ shatei lammihngi lyngba ka roi ka par ba la buh jingmut, ka jingkiew shaphrang kaba kynthup ïa baroh, bad kyntiew ïa ka jingpynpoi ïa ki skhim ba ïadei bad ka bha ka miat. Ki jingïalang ki la ban jur ïa ka jingkut jingmut jong ka Sorkar Pdeng bad ki Sorkar Jylla na ka bynta ka jingsynshar kaba ïatreilang bad kyntiew ïa ka jingim jong ki longkmie bad ki khynnah ha jylla Meghalaya. Ka jingleit jngoh ïa ki Anganwadi Centre bad ki jaka ba pyntrei ïa ki projek kan long ha ka sngi kaba bud ban peit bniah ïa ka jingpyntreikam bad ka jingïatreilang bad ka imlang sahlang.
