Shillong, ïaïong, 19: Ka kynhun ïalekai J. Khriem na Mawlai ka la ïoh khur ïa ka song pisa kaba 50 hajar hadien ba ka la lah ban pynliem noh ïa ka kynhun ïalehkai Umkdait Block IV FC ha ka lympung ïalehkai phainal jong ka 1st Futsal Knockout Tournament ïa kaba la pynlong da ka William Carey University Football Club ha ka sngi Saitjaiñ.
Katba ka Umkdait Block IV FC kaba la wan baar ka la ïoh khur ïa ka song pisa kaba 20 hajar ha kane ka sngi.
Ïa ka nam Best Discipline Team la ïoh rah da ka Combine Brother’s ha kane ka lympung ïalekai, katba ïa ka nam Best Goalkeeper la ïoh rah da u John Franklin Kharnaior na ka kynhun J.Khriem FC, ïa ka nam Best Player la ïoh rah da u Blashan Nongkynrih na ka kynhun J.Khriem FC bad ïa ka nam Top Scorer la ïoh da u Ïaikyrmen Shynreit na ka kynhun ïalehkai Combine Brother’s.
La pynhap pyrda ïa kane ka lympung ïalehkai ba la ïashim bynta da ki 32 tylli ki kynhun ïalekai Futsal da ka Vice Chancellor jong ka William Carey University ka Prof. Dr Soma Bhowmick kaba la long kum ka kongsan ha kane ka sngi ryngkat ka jingsakhi lang jong ki nonghikai bad ki samla pule.
