Shillong, ïaïong, 22: Uwei u self-styled Finance Secretary jong ka seng kieng atiar ba la shah kheiñ beaiñ ha ka jylla Manipur ba la tip kyrteng kum ka Kangleipak Communist Party (People’s War Group) u la shah kem na ka jaka rieh tngen ha Ri-Bhoi District.
Ki Pulit ka Ribhoi kiba la ïoh jingtip na ki tnat syntiat ha ka Lah Sngi u Blei ha ka por kumba 8:30 baje mynmiet ki la pynlong ïa ka jingkhynra ha ka shnong Nongthymmai, 15 Mile, Byrnihat kaba don markhap bad ka khappud jong ka jylla Assam ki la ïohkem ïa u Khundongbam Herojit Meitei na ka ïingsah, la pyntip u Superintendent of Police ka Ribhoi District u V. S Rathore.
Ki Pulit ki la ïoh kurup ruh ar tylli ki mobile phone bad ïa kiwei kiwei ki tiar ba long be-aiñ hadien ba la kem noh ïa u.
U SP u la pyntip ruh ha ka jingtohkit, u Herojit u la phla ba u dei u dkhot jong ka Kangleipak Communist Party (KCP-PWG) ka kynhun kieng atiar kaba la leh ïa ki kam pyntriem ha ka jylla Manipur hadien ba la khie ka jingïaumsnam ha u snem 2023 bad la kynnoh ruh ba u donkti ban dawa pisa ha ka kyrteng jong ka seng.
U la ong ruh ba u Herojit u la riehtngen ha khappud Assam-Meghalaya ban lait na ka jingshah kem ha ki bor Pulit kiba la khyrwit tyngeh ïa ki kynhun lehnoh bapher bapher kiba donkti ban pynthud ïa ka shongsuk shongsaiñ ha ka jylla Manipur.
La suba ruh ba u Herojit u dei uba donkti ban ïasuhbuit bad ki kynhun lehnoh kiba riehtngen ha ka ri Myanmar bad Nepal. U Herojit u dei ruh uba la shah kem ha u snem ba ladep ha ka jylla Manipur halor ka jingdonkti ban buh ïa ki tiar siat beain bad kumjuh ruh ha Dimapur ha u snem 2018 halor ka jingdonkti ban khaii drok.
Ki Pulit ki la register case ha Nongpoh Police Station bad ka jingtohkit ka dang ïaid shakhmat.
