Shillong, Ïaïong, 30: Ka Meghalaya Pradesh Mahila Congress (MPMC) ka la pynpaw ïa ka jingsngewkhia kaba jur halor ka jingkynthoh khlemakor da u Myntri Rangbah ka Assam, u Himanta Biswa Sarma pyrshah ïa ki kynthei.
Ha u kyrwoh ba la phah ha ka sngi Balang da ka President ka Kong Joplyn S. Shylla, ka Meghalaya Pradesh Mahila Congress (MPMC) ka pynpaw ïa ka jingpyrshah kaba jur bad ka jingbitar kaba khraw ïa ka jingkren khlemakor da u Myntri Rangbah ka Assam u Himanta Biswa Sarma uba la kynnoh ba ki kynthei ki ïohkam Sorkar da kaba die ïa ka met lajong.
“Kane ka jingkren ka long kaba shah pynjah burom, ka pynsniew dur ïa ki kynthei bad ka pyndem dor ïa ka jingïaleh jong ki ban ïoh ka burom, ka hok bad ka jingshaniah ha ka imlang sahlang. Ka long ruh ka jingjia kaba pynduh mynsiem ïa ki kynthei kiba trei shitom ban long ki nongïalam bad ban kiew ha ka kam ka jam da ka akor bad ka jingstad,” ong u kyrwoh.
“Ka Meghalaya Pradesh Mahila Congress ka dawa ba u Himanta Biswa Sarma un panmap paidbah halor ka jingkren khlem akor. Ngi kyntu ïa ki bor synshar bad ki bor jong ka Women’s Commission ba kin shimkhia bad pynshitom katkum ka aiñ. Ngi khot sngewbha ïa ki kynthei na baroh ki liang saiñ pyrthei ban ïeng lang ban pyrshah ïa ki jingkren pynjah burom kum kine,” la bynrap shuh shuh u kyrwoh.
“Ki kynthei kim dei ban shah peitpoh ne shah kren beiñ. Ka Mahila Congress kan ïakhun ban pynneh ïa ka burom bad ka jingïatylli jong ki kynthei ha baroh ki liang. Ka burom jong ki kynthei ka dei ban long kaba kyrpang, ym ban pynbiej paidbah ha ka jingïakhun saiñ hima sima,” la ong u kyrwoh.
