Shillong, Ïaïong, 30: U Joint Secretary jong ka All India Congress Committee (AICC) u Anthony Mathew ha ka sngi Balang u la takraiñ tyngeh ïa ka BJP kaba pyrshang ban pynsniew dur ïa ka seng Congress bad ïa ka longïing Gandhi na ka National Herald case.
Hadien ba la wai ka Political Executive Meeting jong ka party ha Congress Bhavan, Shillong, u Mathew ha ka jingïakren bad ki lad pathai khubor u la ong, “ngi kwah ban phah ïa u kyrwoh sha ki paidbah nongshong shnong jong ka jylla Meghalaya ba ka jingpyrshang jong ka BJP ban pynsniewdur ïa ka kyrdan bad ka burom jong ka Congress bad ïa ka longïing Gandhi da ka National Herald bad ka Association of Jounalist Ltd ka dei kaba ngi la ïathir sani bha bad ngi la batai bniah ruh ha ki nongïalam jong ngi bad sha ki paidbah nongshong shnong jong ka Meghalaya lyngba ki District bad ki Block ban ong ba kane ka Case kam don satia kano kano ruh ka sakhi sabut ba shisha, kam don ka jingai pisa, nalor kata ka sorkar kam don satia ha kino kino ki bynta naduh ba la mih kane ka jingjia tad haduh kine ki sngi hynrei ka Sorkar ba mynta ka la pyndonkam da kaEnforcement Directorate (ED) ban wanrah ïa kane ka Case kaba ym don shuh tang ban pynjah burom ïa ka longiing Gandhi bad ïa ka seng Congress, kaba la ïakhun na ka bynta ka jingpynïoh ïa ka jinglaitluid tad haduh mynta.”
“Ka daw ka long namarba ka BJP ka sngewthuh ba wat hapdeng ka jingjop ïa ki elekshon da kaba pyndonkam da ki buit bad ki nongtrei, ka paw shai ba ki dang sngew artatien ban dang sah ha ka bor synshar namarba ki sngewskhem bha ïa ka jingdon jong ka longïing Gandhi bad ka Congress ha ka dor kaba khraw ha manla kawei pa kawei ka mynsiem jong ki paidbah ka ri India bad ka jylla Meghalaya,” u la bynrap.
Shuh shuh u Mathew u la ïathuh ba ka political executive meeting ka la rai ba la rai da ka AICC ka la mynjur ruh ïa ka rai ban ai jingkyrshan ïa ka Sorkar ban ïakhun pyrshah ïa ki lehnoh kiba donkti ban siat ïap ïa ki nongjngohkai pyrthei ha Pahalgam dang shen.
“Ngi la shim ïa kawei ka rai ban ai jingkyrshan ïa ka Sorkar India pyrshah ïa kane ka kam runar bad ban pynshitom pyrshah ïa ki briew kiba donkti, kiba pynmong bad mynsaw ïa ki nongshong shnong jong ka ri,” la ïathuh u Matthew.
U la ong ba ka jingïalang ka la ïakren ruh halor ka jingsngewlem ïa ka jingkhladnoh jong u Pope Francis, uba long uwei na ki nongpynïasuk ha kane ka juk, kumba ngi ladep sakhi.
Ka MPCC hapoh ka jingïalam jong u Bah Ronnie V. Lyngdoh ka la ïakynduh ïa u Archbishop ka Jyllaniambah Shillong u Most Rev. Victor Lyngdoh.
