Shillong, Jymmang, 02: Ka Khasi Hills Autonomous District Council (KHADC) ha ka sngi Thohdieng ka la kyrpad ïa u Lat ka Jylla u CH Vijayashankar ba un pynïarap ban pynsngew lem sha ka Sorkar Pdeng ba kan bhah ïa ka jingkyrshan pisa sha ka Council.
Ka kynhun ki Executive Member jong ka KHADC ba la lamkhmat da u CEM Bah Shemborlang Rynjah ka la aiti ruh da ka dorkhas ka jingïakynduh ïa u Lat ha Raj Bhavan.
“Kumta, ngi kyntu da ka jingsngewrit ba phin sngewbha ban shim khia da kaba pynsngew lem sha ka Sorkar India ban pynkhlaiñ bad ai jingïarap pisa ïa ka council khnang ba kan dup lah ban pyndep ïa ki kamram jong ka katkum ba la kdew hapoh ka Sixth Schedule kaba kynthup ïa ki jingpynlut na ka bynta ban siew ïa ka tulop jong ki dkhot jong ka council bad ïa ki nongtrei,” ong u Bah Rynjah u la ong ha ka dorkhas.
U la ong ba ïa ki Autonomous District Council (ADC) ha Meghalaya la weng khnang na ka khyrnit jong ka 73rd Amendment hapoh ka Article 243M ban ïada ïa ka jinglong ba kyrpang jong kine ki jingsynshar trai ri.
“Hynrei katba ki Panchayati Raj ki ïoh jingïarap pisa beit bad ki don ïa ki bynta ba la batai ha ka jingthmu bad jingpynroi, katba ki shlem synshar trai ri jong ngi ki shah pynduh ïa ki lad jingïarap.
“Da kaba ithuh ïa kane ka jingpynïapher, ka KHADC ka pdiang ïa ka jingdonkam ban pynkylla bad ban pynthymmai ïa kine ki shlem treikam khnnag ban pynthikna ba kin dang ïadei bad treikam ha ka jinglong jingman jong ka synshar khadar ba mynta,” la pynskhem u Bah Rynjah.
Katkum ka jingong jong u, ki don 53 tylli ki Administrative Units ba la tip kum ki Elaka (bor synshar ha ki Hima) bad da ki hajar tylli ki shnong, kiba manla kawei pa kawei ki don la ki jong ki shlem treikam bad ki pud treikam. Kine ki bor synshar ki don ka bynta kaba khraw haduh katta katta ban pynneh pynsah bad ban long u sai bteng jong ka kolshor Khasi ha ki district bad ki rukom imlang sahlang. Ki treikam ryngkat bad ki Panchayati Raj Institution kiba la pawnam ha kiwei pat ki bynta jong ka ri.
Shuh shuh, u CEM ka KHADC u la ong ba wat hapdeng ka jingpyrshang katba lah, ka Council kam shym la lah ban wnarah ïa ka jingangnud ban pynkylla ha ki shnong ki thaw kiba hap hapoh u pud u sam jong ka, khamtam eh ha kaba ïadei bad ka jingpynkupbor ïa ki ban pyntyllun shakhmat ïa ki prokram kiba pynïaid beit ïa ki marpohkhyndew. Kane ka jingbym lah ka mih na ki katto katne ki jingeh ha ka liang ka jingtei bad ka jingpynïaid, u la kdew ha ka dorkhas.
Da kaba pynpaw ba ka Bynrap Bahynriew jong ka riti synshar ka ri long kum u mawjam ha ka synshar ka khadar na ka bynta ki jaidbynriew riewlum kiba don ha ka thaiñ Shatei Lammihngi, u Bah Rynjah u la ong ba ka paw ha ka jingangnud jong jong ki ban pynïaid ïa ki kam ki jam kiba ïadei bad ki riti ki dustur kiba la rim bha.
La thmu ban ïada ïa ka snap jong ki riewlum, ban pynneh pynsah ïa ka pateng tynrai, bad ban ïada ïa ki rukom pynïaid ïa ki marpoh khyndew, khamtam eh ha kaba ïadei bad ka khyndew, ki khlaw ki btap bad kiwei kiwei ki marpoh khyndew, kiba la ai jingmyntoi ïa kine ki jaitbynriew pateng la pateng bynriew.
