Shillong, Jymmang, 05: Ka Government Girls Higher Secondary School Jowai ka la shu duh ei ïa ka nam khamakha tang namarba ka Meghalaya Board of School Education kam pat ai jingithuh ïa ka Commerce Stream jong kane ka skul, ïa kaba la pynmih ha u snem 2023.
Ka jingduhei jong kane ka skul ïa ka nam ka long hadien ba ka Sophia Niang, kaba la ïoh rung ha ka kyrdan kaba 6 ha ka Top Ten jong ka result Higher Secondary School Leaving Certificate Commerce Stream ka la paw kum ka “Regular-II Candidate”.
Ka Principal jong ka skul ka Dr. Waisa Sumer ha ka ka jingïakren bad ka Batesi TV ka la ong ba ka jingbym paw kyrteng jong ka skul ka la pynsngewsih bha haduh katta katta.
Ka la ïathuh ba ka Sophia Niang ka la pule ha kane ka skul naduh Class-VIII bad ka long ka khynnah kaba shimkhia ïa la ka jingpule nalor ba ka long kaba minot bad kaba tipsngi bad lada don kano kano ki prokram ka ju leit mihkhmat na ka bynta ka skul.
Ka la ïathuh ruh ba ha u snem ba ladep ka Sophia ka la ïakhun ïa ka Prerana Utsav bad ka skul ka la ïoh rah ïa ka kyrdan ba nyngkong ha West Jaiñtia Hills District bad la jied ïa ka Sophïa ban leit mihkhmat ïa ka jylla Meghalaya sha Gujurat.
Ka Sophia Niang ka dei ka khun ba nyngkong na ki lai ngut shipara jong u Bah Embok Khongbuh bad ka Kong Anisha Niang na ka shnong Huroi, East Jaiñtia Hills District.
