Shillong, Jymmang, 07: Ka kynhun jong ki khlieh nongsynshar ba la lamkhmat da u MDC ka NPP na Mawsynram Bah Alvin Sawkmie ha ka sngi Balang ki la ïakynduh ïa u Myntri Rangbah ka Jylla u Conrad K Sangma bad ban kyrpad ba un shimkhia ban kyntiew kyrdan ïa ka Mawsynram Community & Rural Development Block sha ka Civil Sub-division bad ban mang pisa na ka bynta ban shna pynheh ïa ka surok kaba pynïasoh na ka shnong Weiloi sha ka shnong Balat.
Haba kren sha ki lad pathai khubor, u Bah Sawkmie u la ong ba kine ki ar tylli ki mat ki dei kiba la sah pongding mynta da ki snem.
“Nga sngewkmen ban pyntip ba u Myntri Rangbah u la shah skhor ïa ka jingkyrpad jong ngi bad ngi kyrmen ba hapoh ka jingïalam jong u ka Mawsynram kan sa ïoh noh shen ïa ka surok kaba thymmai na Weiloi sha Balat bad ïa ka Mawsynram block yn sa kyntiew kyrdan sha ka Civil Sub-division ba thymmai,” u la bynrap.
U la ong ruh ba kan long ka jingkyrkhu kaba khraw ïa ki paidbah lada ka Sorkar ka shimkhia ban pynkha noh ïa ka Civil Sub-division ba thymmai namar kumba ka long mynta ki paidbah na ki shnong kiba jngai jong ka thaiñ Mawsynram ki hap ban wan sha ka Shillong na ka bynta ki kam ki jam ki barit baria bad kane ka ktah haduh katta katta ïa ki la ka long ha ka por, ka pisa bad ka bor.
Shuh shuh, u MDC ula ong ba la pyntip ruh sha ka kynhun ba ïa ka Detailed Project Report (DPR) na ka bynta ban shna ïa ka surok na Weiloi sha Balat ka dang don ha ka jingpynkhreh bad ka Sorkar ka la kular ban mang pisa ïa kane ka surok da ka jingïarap jong ka World Bank.
