Shillong, Jymmang, 14: Ki mar rep jong ki nongrep ka shnong Nongrim Bambthong ka shnong kaba hap ha West Jaintia Hills District ki la duhnong jhor namar ka jingshah shoh phria lut ki mar rep jong ki naduh u sohsaw, phrisbin bad kiwei pat ki mar rep ha ka jinglynshop u phria ha ka 1 tarik mynta u bnai.
U Waheh Shnong jong ka shnong Nongrim Bamthong Bah Bisharbha Khynriam u la ïathuh ba ki don kumba 30 tylli ki longiing kiba shah ktah eh bad na ka liang jong ka shnong ki la leit ban pan jingïarap na ka Sorkar hynrei u la ong ym don ba treh wat tang ban shim ïa ka Form ruh namarba ki nongrep kim don ïa ka Aadhaar Card.
U General Secretary jong ka Hill Farmers Union (HFU) Bah Alfond Kharsyntiew u la kyrpad ïa ka Sorkar Jylla ba kam dei ban ieh beiñ ïa ki nongrep bad ka dei ban pynkloi ban ai jingïarap ïa ki.
